Vírùs di Papiloma Humano (VPH)
VPH ta un vírùs ku bo por haña durante sèks. Kondon no ta protehá kontra VPH. Bo a yega di tene relashon seksual? E ora ei bo por tin e vírùs den bo kurpa.
Normalmente VPH no ta kousa ningun daño. I e vírùs ta bai di su mes. Pero algun tipo di VPH por kousa kanser mas lat den bida. Un otro tipo ta kousa frèt genital. Na Kòrsou, ta ofresé e bakuna di VPH na mucha muhé i mucha hòmber komo parti di nan skema di bakuna di infansia. Esaki lo redusí e chèns di desaroyá kanser mas lat den bida konsiderablemente.
Síntomanan
Normalmente bo no ta ripará ku bo tin VPH. Síntomanan ku bo por tin ta:
- Frèt na bo pénis, vagina or anus. Ta yama esakinan frètnan genital
- Sangramentu vaginal, kisas despues di sèks. Esaki lo por ta un síntoma di kanser servikal (kanser di boka di matris). Pero esaki ta mashá eksepshonal bou di hende muhé hóben. Normalmente, sangramentu ta keda kousá pa un otro ITS, manera klamidia. Of algu otro ku no ta serio
Talbes ta algu otro por ta kousando bo síntoma tambe. Si bo tin kualke síntoma, bishitá bo dòkter. No warda muchu pa traha un sita.
VPH i kanser
Tin diferente tipo di VPH. Algun di esakinan por kondusí na desaroyo di kanser serka bo. Muhénan hóben por haña kanser di boka di matris, kanser di vagina òf kanser di vulva. Hòmbernan hóben por haña kanser di pénis. I tur hóben por haña kanser di garganta òf anus.
Bo por protehá bo mes dor di laga bakuná bo mes: un bakunashon di VPH. E ora ei tin muchu ménos chèns ku bo ta desaroyá kanser.
Bo tin frèt genital? Esakinan ta keda kousá pa un otro tipo di VPH. E vírùs di VPH akí no ta oumentá e chèns di haña kanser.
Tratamentu
Normalmente VPH ta kita di su mes. Ke men, bo no tin nodi bai dòkter òf uza remedi.
Bakunashon VPH
Bo ta haña bakuna kontra VPH. Si bo laga bakuná bo mes, esaki lo konsiderablemente redusí e chèns ku bo ta desaroyá kanser kousá pa VPH. Komo parti di bakunashon di mucha, ta ofresé muchanan na Kòrsou un bakuna ku yama Gardasil 4. Esaki ta ofresé protekshon kontra tiponan di VPH ku ta komunmente asosiá ku frèt genital i kanser servikal.
Si bo no a risibí e bakuna di VPH òf ke sa mas tokante esaki, tuma kontakto ku CSGC.
Otro tópiko
Sigui eksplorá bo salú seksual.
Trikomoniasis
Trikomoniasis of triko ta un ITS. Bo ta pega otro kuné durante sèks, spesialmente si bo no ta uza kondon. Tin biaha bo tin síntoma,...
Candidiasis
Tordo ta un infekshon di fungo. Algun fungo a krese muchu den bo kurpa e ora ei. Na bo vagina òf pénis, òf kisas den...
Plateis
Plateis ta insektonan chikitu ku por biba den kabei púbiko. Bo por haña nan den bo kabeinan di wowo, barba òf otro kabei di kurpa....
