Si bo ta seksualmente aktivo, semper hasi un tèst di ITS ora bo tin un pareha nobo.

Mi tabata un bírgen ora mi a haña algu ku mi frei. Mi tabata sa sigur ku mi no tabatin un infekshon transmití seksualmente (ITS), pasobra mi no tabata seksualmente aktivo. Mi a pidi mi frei pa hasi un tèst di ITS promé ku nos drumi huntu. E no a bai, i mi no a sigui insistí. Na dado momentu, mi a sinti un sensashon di kimamentu den mi vagina. Mi a buska riba Google i mi síntomanan tabata similar na un ITS, manera klamidia òf herpes. Pániko a dominá mi.

Test di ITS
Mi frei tabata ku fakansi afó ora mi a bis’é. E tabata den shòk.
Mi a bai dòkter pa e molèster ku mi tabata sinti. El a mira ku mi vagina tabata inflamá i a deskartá un infekshon di fungo. E dòkter a tèst pa e kuater ITSnan mas komun, inkluso klamidia i sífilis. E tabata sospechá ku tabata klamidia. Pa seguridat, e dòkter a dunami un resèpt entre otro pa antibiótika kontra infekshon di fungo. E doló i e grawatashi a kita. Mi mama tabata mi sosten di mas grandi miéntras mi tabata warda e resultado ku hopi strès.

Resultado indesiso

Ora ku e dòkter a yama ku e resultado, el a bisa ku no ta posibel pa detektá un ITS. Esaki por tin diferente interpretashon. Por ehèmpel, mi por tabatin un ITS ku a kura di su mes. Of, nunka mi no a keda infektá. Mi ginekológo a rekomendá pa mi hasi un tèst di ITS mas ekstenso. Mi frei tambe a hasi tèst ora el a regresá for di fakansi. 

Duele

Mi ta lamentá di a bandoná mi prinsipio. Mi a pensa ku si mi komplasé mi frei, e lo a sintié mihó. E promé biahanan nos a uza kondon, pero despues di un ratu el a pidimi pa tene sèks sin protekshon pa su plaser. E ta sinti mas sensashon sin kondon. Mi a bai di akuerdo.Protekshon
Di awó padilanti, nos ta uza kondon kada bes ku nos tene relashon seksual. Nos a papia tambe tokante uzo di lubrikante, ya ku esaki ta redusí iritashon. Awor ku mi wak bèk, mi ta komprondé ku mi no por kulpa mi frei. It takes two to tango. Nos tur dos tabata parti di esaki. Mi ta tuma mi responsabilidat pa mi akshonnan i mi a siña mi lès. Si bo ta seksualmente aktivo, semper hasi un tèst di ITS ora bo tin un pareha nobo.