Mirando bèk riba e situashon lo mi a baha for di e bùs
Mirando bèk riba e situashon lo mi a baha for di e bùs òf lo mi a bai sinta banda di e shofùr pa mi seguridat.
Mi a kaba di kue bùs na Otrobanda pa bai kas despues di skol. Ora ku e bùs a yega Weg naar Welgelegen un grupo di sinku òf seis mucha hòmber a drenta. Ounke e bùs tabata bashí nan a skohe e asientonan serka di mi. Esun sintá banda di mi a kuminsá tek mi riba mi skouder. Mi tabata skucha muzik den mi earpiece i mi no a reakshoná.
Sugestivo
E tabata bisa su amigunan ku mi ta bunita i ku e tabata ke mi number. Diripiente e tipo a kuminsá mishi ku mi telefòn selular ku tabata den mi skochi. El a keda karisiá mi telefòn. Mi tabata paralisá. E moveshon tabata sugestivo. Un di su amigunan a bis’é pa stòp. Loke e no a hasi. E tabata ke hinka su number den mi telefòn selular. E otronan a keda wak i hari. Mi a sinti mi inkómodo. Pensamentu agresivo a drenta mi kabes. Na mes momentu mi tabatin miedu. Si un kos lo a pasami, kiko lo mi por a hasi kontra di nan tur?
Intervení
E shofùr di bùs no a intervení. E grupo a pidi e shofùr pa bahami promé, p’asina nan sa unda mi ta biba pa nan por bishitá mi na kas. Danki Dios e shofùr di bùs a sigui su ruta. Ora nan a baha, un pa un nan tabata yama mi ayó, keda wakmi den mi kara ora nan a duna e shofùr sèn i yama mi dushi. No ta nada nobo ku mucha hòmbernan ta dal tira riba mi, pero e kaso aki a lagami sinti insigur.
No preokupá
Ora nan tur a baha e shofùr tabatin e kurashi pa komentá ‘ègt ko’i mucha hòmber. Bo no mester preokupá ku e ko’i.’ Nunka mas mi a subi e bùs ei. Mi no a sintimi sigur.
Ainda mi ta sintimi inkómodo ora mi mira e mucha hòmber. Mi ta kere ku si un hende muhé lo a kore e bùs, e lo a aktua lo kontrario. Mi tin sigur ku e lo a hala atenshon di e mucha hòmber òf lagami sinta dilanti. Mirando bèk riba e situashon lo mi a baha for di e bùs òf lo mi a bai sinta banda di e shofùr pa mi seguridat. E dia ei e úniko kos den mi mente tabata ‘Mi ke yega kas pa kaba’. Mi pianan tabata di vris na nan lugá.
