Pleister antikonseptivo

Kon e ta funshoná?

Kada pleister ta saka hormona diariamente pa 1 siman. Bo ta kambia e pleister kada 7 dia durante 3 siman. E di 4 siman ta un siman sin pleister. Ta e ora ei bo ta haña bo menstruashon i bo ta protehá ainda kontra embaraso. Bo por tin e pleister pegá miéntras bo ta landa òf baña. 

Kon pa uz’é

• Pega un pleister un kaminda riba bo kueru. Esaki por ta unda ku ta, ku eksepshon di riba bo pechunan òf bèlnan di pia.

Pone bo promé pleister i lag’é keda pa 7 dia. Riba dia 8, kambia e pleister pa unu nobo. Ripití esaki pa 3 siman largu i despues bo mester tin un siman sin pleister. 

Unda bo por haña pleister?

Pidi bo dòkter pa un reseta pa pleister antikonseptivo. Bo por kumpra e pleisternan na botika. 

Bentaha i desbentaha

Bentaha:

• Bo mester pensa riba dje solamente un biaha pa siman
• Bo sa ki dia bo ta haña bo menstruashon
• Bo por retrasá bo menstruashon dor di salta bo siman sin pleister
• E pleister ta te asta konfiabel ora bo ta saka òf tin diarea

Desbentaha:

• Bo por eksperensiá efektonan sekundario ora bo kuminsá uza un pleister
• Bo por lubidá di pone un pleister nobo
• Tin biaha e pleister ta visibel

Tin efektonan sekundario?

Ora bo kuminsá uza e pleister antikonseptivo, lo bo por eksperensiá algun efekto sekundario. Esaki ta pasó bo kurpa tin ku kustumbrá ku e hormonanan ku tin den e pleister. Posibel efektonan sekundario ta:

• doló di kabes
• pèrdida di sanger iregular
• pechunan doloroso
• walmentu di stoma
• estado di ánimo abou
• subida di peso
• deseo seksual redusí

Normalmente, e efektonan sekundario ta disparsé despues di un par di luna. Tuma kontakto ku bo dòkter si bo tin problema ku efektonan sekundario.

Ki bo ta hasi ora algu bai robes?

• E pleister a lòs: Pega un pleister nobo riba bo kueru denter di 24 ora. Esaki lo mantené bo bon protehá.
• B’a lubidá di pega un pleister (ménos ku 24 ora): Pega un pleister mas lihé posibel. 
• B’a lubidá di pega un pleister (mas ku 24 ora): Pega un pleister mesora. Nota: awor lo bo no ta bon protehá kontra embaraso pa 7 dia. Uza un kondon si bo hasi sèks ku penetrashon di pénis den vagina.
• B’a lubidá di stòp despues di 3 siman: No ta un problema si bo tin bo pleister pegá ainda durante e siman di pousa. Hasi e siman di pousa mas kòrtiku. Bo por pega esaki bèk tambe mesora i salta e siman di pousa.  

Ki ora bo ta kore e rísiko di embaraso?

• Si bo a kuminsá pega bo pleister nobo muchu lat (pues bo siman sin pleister tabata mas largu ku 7 dia).
• Si bo a laga bo pleister bieu pa mas ku un siman.

ITS

Kòrda bon: e pleister antikonseptivo no ta protehá kontra ITS. Pa prevení ITS bo mester uza un kondon.