Renchi Antikonseptivo 

Kon e ta funshoná?

E renchi antikonseptivo ta lansa dósis abou di hormona tur dia. Esakinan ta protehá bo kontra embaraso pa un luna largu. 

Kon pa uz’é

• Mantené e renchi den bo vagina pa 3 siman tras di otro.
• Saka e renchi despues di 3 siman. No hinka un renchi nobo pa 1 siman. Ta yama esaki e ‘intervalo sin renchi’ i ta ora bo tin bo menstruashon. Den e siman sin renchi bo ta protehá tambe kontra embaraso.
• Hinka un renchi nobo despues di 1 siman sin un renchi.

Unda bo por haña e renchi vaginal?

Pidi bo dòkter pa un reseta pa e renchi vaginal. No ta tur botika riba e isla tin e renchi vaginal den stòk. Bo dòkter por bisabo di e botikanan ku tin esaki regularmente den stòk. 

No un menstruashon di bèrdat

Den e siman sin renchi lo bo sangra un tiki. E ta parse un menstruashon i e ta sinti asina tambe, pero bo no ta menstruando realmente. Kon esaki ta funshoná?

Tur luna tin un webu nobo den bo matris. Esaki ta sosodé durante ovulashon. Durante un menstruashon normal, ta deshasí di e webu ei. Si bo uza e renchi vaginal korektamente, bo no ta ovulá. Pues, no tin webu pa deshasí di dje. Ta p’esei bo no ta hañando un menstruashon di bèrdat, djis un tiki sangramentu.

Bentaha i desbentaha

Bentaha:

• Bo mester pensa riba dje solamente dos biaha pa luna
• Bo sa ki dia bo ta haña bo menstruashon
• Bo por posponé e sangramentu
• Sakamentu òf diarea no ta afektá su konfiabilidat
• E renchi ta invisibel

Desbentaha:

• Tin biaha bo por eksperensiá efektonan sekundario
• Lo bo por lubidá di hinka un renchi nobo despues di 4 siman
• E renchi no ta protehá kontra ITS
• Un rísiko un tiki mas haltu (kompará ku e píldora) di efekto sekundario serio manera kuahamentu di sanger

Tin efektonan sekundario?

Ora bo kuminsá uza un renchi vaginal, bo por tin algun efekto sekundario. Esaki ta pasobra bo kurpa mester kustumbrá ku e hormona  ku tin den e renchi. Posibel efekto sekundario ta:

• doló di kabes
• pèrdida di sanger iregular
• pechunan doloroso
• walmentu di stoma
• estado di ánimo abou
• subida di peso
• deseo seksual redusí

Normalmente, e efektonan sekundario ta disparsé despues di un par di luna. Tuma kontakto ku bo dòkter si bo tin problema ku efekto sekundario.

Ki ora bo ta kore e rísiko di embaraso?

• Si bo hinka un renchi nobo muchu lat (mas ku 7 dia despues di kita e renchi bieu)
• Si bo keda ku e renchi den bo pa mas ku 3 siman

ITS

Kòrda bon: e renchi vaginal no ta protehá kontra  ITS. Pa prevení ITS, bo mester uza kondon.