Frèt genital

Frèt genital

Frèt genital ta krese denter, riba òf rondó di bo genitalnan i bo anus. Bo ta pega ku nan via sèks, spesialmente si un hende tin frètnan visibel na tal momentu. E frètnan ta keda kousá pa un vìrùs di frèt: Vírùs di Papiloma Humano (VPH). Frèt genital no ta dañoso i mayoria biaha nan ta bai di nan mes. Si nan ta molestiá bo, bo por haña tratamentu.

Kon bo por sa ku nan ta frètnan genital?

Frètnan Genital parse blumkol chikitu. Nan ta kòrá-ros òf shinishi-blanku
Normalmente bo ta haña algun frèt chikí promé. Hopi biaha, nan lo krese i plama e ora ei
Nan por ta doloroso òf kousa grawatashi
Nan por krese den bo vagina òf anus tambe. E ora ei lo bo no mira nan

Tratamentu

Frètnan Genital no ta dañoso. No nesesariamente mester risibí tratamentu pa nan. Pero si nan ta molestiá bo, tin tratamentu ku bo por purba:

Bo por hunta un krema riba nan
Dòkter por kita e frètnan dor di keinta nan òf apliká un líkido riba nan
Si nan ta hopi, dòkter por kita nan kirúrgikamente. Ta hasi esaki bou di anestesia lokal

E frètnan por bini bèk, pasó por sosode ku e vírùs ku ta kousa nan ta keda den bo kurpa.

Vírùs di frèt: VPH

Frèt Genital ta keda kousá pa un vírùs: VPH. Komo parti di bakunashonnan di infansia ta ofresé muchanan na Kòrsou un bakuna ku yama Gardasil 4. Esaki ta ofresé protekshon kontra variedatnan di VPH ku ta asosiá ku Frèt Genital i kanser di matris.

Si bo no a risibí e bakuna di VPH òf bo ke siña mas tokante esaki, tuma kontakto ku CSGC.