Implante hormonal
E implante hormonal ta prevení embaraso. E ta un bara chikitu den bo brasa ariba, mas o ménos mes grandi ku un palu di lusafè. E implante ta mes konfiabel ku e píldora. Un otro palabra pa implante hormonal ta implante antikonseptivo.
Kon e ta funshoná?
Un dòkter ta pone e implante den bo brasa ariba. Kada dia, e bara ta saka un dósis chikí di hormona den bo kurpa. Di e manera akí, e ta protehá bo kontra embaraso pa un máksimo di 3 aña.
Loke bo mester hasi
- Puntra bo dòkter si e implante akí ta adekuá pa bo
- Buska un dòkter spesialisá pa pone e implante den bo brasa ariba
- Bo por laga e implante na su lugá pa 3 aña
Unda bo por haña e implante?
Bai serka un dòkter spesialisá pa pone e implante. Puntra bo mes dòkter si e por hasié òf tuma kontakto ku Fundashon Famia Planiá. E implante por kosta mas o ménos 250 florin.
Bo regla
Bo no por posponé bo regla ku e implante antikonseptivo. Bo regla por bira mas iregular òf stòp kompletamente.
Bentaha i desbentaha
Bentaha:
- Bo mester pensa riba antikonseptivo solamente un biaha kada 3 aña
- E ta hopi konfiabel: bo no por lubidá e implante, manera bo por lubidá e píldora
- Por kita e implante fásilmente i pa pone esaki ta kasi sin doló
- E implante antikonseptivo ta konfiabel te asta si bo ta saka òf tin diarea
- Menstruashonnan ta ménos doloroso òf ta stòp kompletamente
Desbentaha:
- Un dòkter spesialisá mester pon’é
- Sierto hende muhé tin efektonan sekundario
- Bo no por plania òf posponé bo menstruashon ku un implante. Lo bo no sa ki ora bo ta haña un sangramentu. Kisas lo bo no eksperensiá ningun sangramentu vaginal ètòl
- E implante no ta protehá kontra ITS
Tin efektonan sekundario?
Ora ku kaba di pone e implante, lo bo por tin algun efekto sekundario. Esaki ta pasó bo kurpa tin ku kustumbrá ku e hormonanan ku e bara ta kontené. Posibel efektonan sekundario ta:
- pèrdida di sanger iregular
- doló di kabes
- pèshi
- pèrdida di kabei
- pechunan doloroso
- estado di ánimo abou
- subida di peso
Normalmente, e efektonan sekundario ta disparsé despues di un par di luna. Tuma kontakto ku bo dòkter si bo tin problema ku efektonan sekundario.
Ki ora bo ta kore rísiko di embaraso?
Si bo ta muchu lat pa haña bo siguiente implante (bo a warda mas tantu ku 3 aña).
ITS
Kòrda bon: e implante antikonseptivo no ta protehá kontra ITS. Pa prevení ITS, bo mester uza kondon.
Otro tópiko
Sigui eksplorá bo salú seksual.
Métodonan ménos konfiabel
Si bo no ta kla pa haña yu ainda, e ora ei definitivamente bo no ke sali na estado, òf saka un mucha muhé na...
Apstinensia
Apstinensia ta nifiká skohe pa no tene relashon seksual, kual ta e úniko manera 100% efikas pa prevení embaraso i ITS. Algun hende ta praktiká...
Kapa i Diafragma
Un diafragma (òf kapa) ta un kúpula suave di silikon ku ta kubri e boka di matris (e entrada pa e matris). Si uz’é korektamente,...
