Métodonan ménos konfiabel

1. Sak’é afó

Loke bo ta hasi: E hòmber ta saka su pénis for di e muhé su vagina djis promé ku e eyakulá. Simia no ta drenta e vagina.

Ménos konfiabel! Hopi biaha simia ta sali promé ku bo por realisá. Ke men, esaki ta un método ménos konfiabel.

2. Método di konsientisashon di fertilidat

Durashon di siklo menstrual

Loke bo ta hasi: Bo no ta tene relashon seksual riba dianan ku e dama tin mas chèns di sali na estado. Hende muhé ku tin menstruashon regular por marka e dianan ei riba un kalènder. Kon esaki ta funshoná? Ovulashon ta sosodé alrededor di 14 dia despues di e último dia di e último menstruashon. Na tal momentu bo tin mas chèns di sali na estado. E chèns ku un webu lo keda fertilisá ta ménos probabel riba otro dianan, pero tòg ta posibel pa sali na estado e ora ei tambe pasobra sperma por sobrebibí den kurpa femenino pa alrededor di 5 dia!

Ménos konfiabel! No ta semper ovulashon ta tuma lugá riba e mesun dia. Kisas pasobra bo a haña grip òf pa motibu di poko strès.

Pues, ta hopi difísil pa pronostiká ki ora bo tin mas chèns di ta fértil. Bo kurpa tin su propio ritmo, pues e no ta funshoná manera un oloshi òf un kòmpiuter.

Temperatura di kurpa

Loke bo ta hasi: Bo no ta tene relashon seksual riba e dianan ku e dama tin mas chèns di sali na estado. Bo ta pronostiká kua dianan esakinan ta dor di midi bo temperatura. Kon esaki ta funshoná? Riba e dianan ku bo ta fértil, bo temperatura di kurpa ta un tiki mas abou ku riba otro dianan. Ke men, na tal momentu bo no ta tene relashon seksual.

Ménos konfiabel! Bo temperatura di kurpa por keda afektá pa tur tipo di kos, manera deporte òf ehersisio, wer, un ferkout òf bebementu di alkohòl. Hopi hende muhé i mucha muhé ta ovulá iregularmente. Bo kurpa tin su propio ritmo, pues e no ta funshoná manera un oloshi òf un kòmpiuter.

Monitoreo di sleim servikal

Loke bo ta hasi: Bo no ta tene relashon seksual riba dianan ku e dama tin mas chèns di sali na estado. Bo sleim servikal ta dunabo un indikashon. Kon esaki ta funshoná? E tipo di sleim den bo vagina ta bisabo kon fértil bo ta.

Ménos konfiabel! E método akí ta ménos konfiabel. E kantidat di sleim servikal por keda afektá pa hopi otro kos.

Famia Planiá Natural (métodonan kombiná)

Kiko e ta?

Bo por kombiná tambe e métodonan di dianan fértil. Esaki ta oumentá e chèns ku bo por pronostiká ovulashon korektamente.

Ehèmpel: Ki ora bo ta ovulá?

• Bo ta registrá na ki momentu bo tin bo menstruashon pa algun luna. Na mes momentu, bo ta midi bo temperatura tur mainta. Registrá tur esaki.

• Si bo temperatura baha, bo a kaba di ovulá. Wak si esaki ta sosodé na e mesun momentu tur luna. Awor bo por pronostiká bo ovulashon.

• Kontrolá bo deskarga vaginal rondó di e momentu di ovulashon sperá. Bo deskarga ta koló kla i elástiko? E ora ei bo ovulashon ta yegando.

Dikon e ta ménos konfiabel?

• E ta hopi trabou i basta difísil pa hasi esaki kuidadosamente tur dia.
• Ta difísil pa komprondé kon pa pronostiká ovulashon ku e método akí. E konseho ta pa sigui un kurso pa esaki.
• Ora bo ta yòn, bo menstruashonnan no ta regular ainda. P’esei ta difísil pa pronostiká ovulashon.

Si definitivamente bo no ke sali na estado, skohe antikonseptivo. E ora ei bo sa sigur ku bo tin un método konfiabel pa prevení embaraso.

Ki ora e métodonan akí ta adekuá?

E 4 métodonan natural akí ta adekuá solamente si:

• Abo i bo partner tene relashon seksual solamente riba e dianan ku tin ménos chèns di embaraso.

• Niun di boso dos lo no tin opheshon pa bira mayor.

• Bo ta haña bo menstruashon na eksaktamente e mesun momentu tur luna.

• Bo ta na altura di bo siklo menstrual na diferente ora di dia.

• Bo tin un estilo di bida saludabel i konstante.

Bon protekshon kontra embaraso

Bo ke prevení embaraso? E ora ei bo mester tuma e píldora, uza kondon òf purba un otro método antikonseptivo konfiabel.