Terminashon di embaraso

Kiko un aborto ta enserá?

Skèn di ultrazonido

Normalmente un hende muhé lo hasi un skèn di ultrazonido promé, pa haña sa largura eksakto di e embaraso. Esaki ta nesesario tambe pa wak kua método por uza pa e terminashon, aborto médiko ku píldora di aborto òf aspirashon di vakuo. 

Muchu lihé?

Si un hende muhé su menstruashon ta solamente un par di dia lat, e ultrazonido kisas lo no mustra nada. Si fecha di e último menstruashon ta sigur, por hasi un aborto médiko. Sinembargo, si tabatin solamente sangramentu leve òf kualke insertidumbre tokante e siklo di menstruashon, talbes lo e mester warda un òf dos siman mas pa e prosedura. Den kasonan asina, ta realisá dos tèst di embaraso denter di un siman pa monitoriá progreso di embaraso òf desaroyo di e aborto. 

Sita

Ora un hende muhé bai serka un dunadó di kuido médiko pa un aborto,  lo hasié diferente pregunta normalmente, manera:

• Ki dia bo tabatin bo menstruashon pa último biaha?
• Un aborto ta bo mes skohensia?
• Bo ta duda tokante bo desishon?
• Lo bo ke papia ku un hende tokante esaki?
• Bo ke wak e skèn di ultrazonido?
• Tin chèns ku bo tin un ITS?
• Bo a pensa riba antikonseptivo despues di e aborto?

Método pa Terminashon di Embaraso

Tin diferente manera pa terminá un embaraso. 

1. Ménos ku 10 siman na estado 

Por hasi uzo di dos método di aborto pa embarasonan di 10 siman i ménos

• Píldora di aborto: Un aborto médiko ta enserá tumamentu di medikashon pa terminá e embaraso, ku  guia di un dòkter.
• Aspirashon di vakuo: Un aspirashon di vakuo òf chupamentu ta enserá un tubu di plèstik fini, ku ta hinka den e vagina pa hasi e matris bashí. Durante e prosedura kirúrgiko akí, ta chupa kontenido di e matris suavemente saka afó.
   

2. Entre 10 pa 12 siman

• Aspirashon di vakuo: Un aspirashon di vakuo òf chupamentu ta enserá un tubu di plèstik fini, ku ta hinka den e vagina pa hasi e matris bashí. Durante e prosedura kirúrgiko aki, ta chupa kontenido di e matris suavemente saka afó. 

3. Mas ku 13 siman di embaraso – Dilatashon i Evakuashon

Si un hende muhé ta mas ku 13 siman na estado, un aborto ta posibel ainda den e konteksto hulandes. Por hasi esaki te ku 22 siman. Na tal momentu ta hasi e matris bashí hasiendo uzo di un tubu i algun instrumento spesial. 

4. Mas ku 22 siman di embaraso – Aborto no ta posibel di manera rutinario

Si un hende muhe tin mas ku 22 siman na estado, e no por laga terminá e embaraso mas. Si tin un defekto serio na e feto, e dama por laga terminá e embaraso den un hospital. Esaki ta posibel te ku 24 siman den konteksto hulandes.   

Píldora di aborto

E ‘píldora di aborto’ ta un kombinashon di diferente tablèt:

Mester tuma e píldoranan akí  solamente bou di guia di un dòkter. No buska e píldoranan aki pafó di e ambiente di kuido médiko.

Ta tuma e promé tablèt na ofisina di dòkter. E tablèt akí (mifepristone) ta stroba e hormonanan di embaraso di traha, ta lòs e embrio for di muraya di e matris i ta habri e boka di matris (entrada pa e matris).

Ta tuma kuater tablèt (misoprostol) na kas entre 24 i 48 ora despues. Normalmente, e dòkter ta konsehá pa hinka e 4 tablètnan den e vagina. Pero ta posibel tambe pa laga e tablètnan dirti den boka. E remedi akí ta laga e matris kontraé, i e embaraso ta pasa dor di e vagina, ku un tiki sangramentu. E ta parse un menstruashon pisá.

Bo mester buska e píldoranan akí solamente serka un dòkter òf botikario. Nunka no kumpra e píldoranan akí riba kaya. Tuma e píldoranan aki sin guia di un dòkter por tin implikashonnan serio pa bo salú.

Kon largu e sangramentu ta dura?

Normalmente, e sangramentu ta dura mas o ménos 1 siman, tin biaha e por dura te ku 4 siman. Kuantu un hende muhé ta sangra tambe ta varia pa persona. 

Un píldora di aborto aborto no ta un píldora di e mainta despues 

Un píldora di aborto ta otro for di un píldora di e mainta despues.  Ta tuma e píldora di e mainta despues djis despues ku a hasi sèks no-protehá. Un píldora di e mainta despues por  prevení embaraso. Ta tuma un píldora di aborto ora un hende muhé ta na estado kaba. E píldora di aborto ta terminá e embaraso.

Aspirashon di vakuo

Durante un aspirashon di vakuo, ta hasi e matris bashí via e vagina, hasiendo uzo di un tubu fini. Normalmente, ta duna remedi for di delantá pa habri e boka di matris (entrada pa e matris) suavemente i pa un tiki alivio di doló. Despues e dòkter ta hinka un instrumento spesial den e vagina, ku ta tene esaki habrí. Ta duna e boka di matris un anestesia lokal, pa e dama no sinti nada. E dòkter ta saka e embaraso for di e matris via un tubu fini. E prosedura ta dura mas o ménos 10 minüt.  

E ta doloroso?

Hende muhé por sinti un doló kòrtiku i skèrpi segun ku ta duna e anestesia lokal. Nan por sinti un tiki kram tambe durante e prosedura. E kramnan akí ta similar na dolónan di menstruashonnan fèrfelu.

Despues di e aborto

Despues di e prosedura, ta konsehá damanan pa keda un ratu na ofisina di dòkter pa rekuperá. Normalmente, e kram ta bai despues di e prosedura, pero kram di stoma por sigui pa un par di dia despues. Ta preskribí antibiótika pa prevení infekshon i ta duna konseho tokante alivio di doló. Normalmente tin un tiki sangramentu, paresido na un menstruashon normal.

Kon largu e sangramentu ta dura?

Hopi biaha, e sangramentu ta stòp denter di 2 siman, pero e por dura mas largu ku esei òf stòp djis despues di e prosedura.

Kiko ta mas efektivo: un píldora di aborto òf un aspirashon di vakuo?

Tantu un píldora di aborto komo un aspirashon di vakuo ta efektivo pa terminá un embaraso i tur dos ta seif si realisá nan bou di supervishon médiko di un dòkter. Den kaso di tur dos prosedura, tin un chèns chikitu ku e embaraso no a terminá. Ta p’esei ta importante pa hasi un tèst di embaraso despues di 3 pa 4 siman.

Chekeo

Ta programá un sita di kòntròl pa 1 siman despues di e prosedura i si ta nesesario, lo programá mas chekeo. E dòkter lo kontrolá si e terminashon a bai bon. Nan lo revisá kualke difikultat físiko òf emoshonal ku e dama ta eksperensiá. Nan lo duna konseho tambe tokante antikonseptivo. 

Laga pone un IUD 

Tin hende muhé ku gusta uza un IUD hormonal òf di koper despues di un aborto. Si nan tin un aspirashon di vakuo, por pone e IUD mesora. Si nan disidí di tuma e píldora di aborto, por instalá un IUD,  3 pa 4 siman despues. Por pone un implante antikonseptivo den brasa di un dama mesora.

Un aborto ta afektá fertilidat?

Nò, bo fertilidat no ta kambia despues di un aborto. Sí t’asina ku fertilidat ta baha segun ku un hende muhé ta bira mas bieu. Normalmente for di edat di 35 aña.