Protehá bo mes & respetá otronan

Tep pa protehá bo mes

Sigui e tepnan aki si bo ta sali, topa un hende nobo, òf biaha bo so:

• Bai ku un telefon kargá ku sufisiente krédito òf data
• Laga un hende ku bo ta konfia sa unda bo ta bai i ki ora bo ta regresá
• Bo ta bai topa un hende pa promé biaha? Kiubo bo bai ku un amigu?
• Skohe un lugá públiko ku ta fásil pa bandoná si bo ta sintibo inkómodo
• Konfia bo instinto – si algu no ta sinti bon, bai for di einan. Bo no debe niun hende niun splikashon

Konosé bo propio límitenan

Kiko bo ta sintibo kómodo kuné ora ta trata di sunchi, mishimentu òf sèks? Pensa riba esaki fo’i delantá por hasié mas fásil pa ekspresá kiko bo ke – i kiko bo no ke.

Puntra bo mes:

• Mi ke sunchi riba e promé sita?
• Mi ta di akuerdo pa un hende mishi ku mi? Si ta asina, na unda?
• Mi ta sintimi kla pa sèks, òf mi ke warda?

No tin un kontesta korekto òf robes – djis loke ta sinti korekto pa bo.

Sea kla for di kuminsamentu

Mas lihé bo ekspresá bo límitenan, mas mihó. Malkomprondementu ta sosodé ora ku keda sin bisa sierto kos.

Ehèmpel:

• “Bo ke bin wak un pelíkula?” por nifiká diferente kos pa diferente hende. Si bo ta interesá solamente den wak e pelíkula, bo por bisa: “Sigur, pero djis pa bo sa, ta realmente pelíkua so mi ke wak.”

Si bo ta stret no ta nifiká ku esaki lo ruiná e momentu—e ta hasié mas kla i mas kómodo pa boso tur dos.

Semper bo por kambia di idea

Ta kompletamente oké pa kambia di idea na kualke momentu.

• Talbes bo a pensa ku bo tabata ke sunchi, pero awor bo no tin gana mas
• Talbes bo a plania pa tene relashon seksual, pero awor bo no ta sigur

Esaki ta oké. Bo límitenan por kambia i nunka bo no mester sigui ku algu djis pasobra bo a bai di akuerdo na promé instante.

Bisa sí na un kos no ta nifiká bisa sí na tur kos

• Bo por disfrutá di sunchi pero bo no ke pa mishi ku bo na un manera íntimo
• Bo por bai kas ku un hende pero no ke tene relashon seksual
• Bo por bisa si na sèks un biaha pero nò otro biaha

Bo no mester splika òf hustifiká bo límitenan. Si algu no ta sinti bon, papia sin miedu.

Papia tokante sèks

Papia tokante sèks por sinti straño, pero ta e mihó manera pa sòru pa boso tur dos ta kómodo i disfrutá di e eksperensia.

Promé ku i durante sèks, puntra:

• “Kiko bo gusta?”
• “Esaki ta sinti bon pa bo?”
• “Bo ke sigui òf bo ke nos stòp?”

Bon sèks ta un kestion di komunikashon i rèspèt—pa bo mes i bo partner.