Reflekshoná riba bo límitenan i loke bo ke

1. Bo ke di bèrdat?

Puntra bo mes: Mi ta hasiendo esaki pasó mi ke di bèrdat òf pasó mi ta sintimi bou di preshon? Nunka bo no mester sintibo fòrsá, hanshá òf manera kos ku bo mester hasié pa tene un hende kontentu.

2. Bo ta sinti bo emoshonalmente kla?

Sèks por lanta emoshonnan manera eksitashon, amor, nèrvio, òf asta lamento. Bo ta kla pa manehá e parti emoshonal di sèks? Bo ta sintibo kómodo pa papia tokante bo sintimentunan ku bo partner?

3. Bo sa ki ta konsentimentu?

Tantu abo komo bo partner mester bisa “sí” na sèks ku entusiasmo – sin preshon, kulpa òf miedu. Konsentimentu ta kontinuo, loke ta nifiká ku bo por kambia di opinion na kualke momentu.

4. Bo a papia tokante ITS i embaraso?

Bo sa kon pa protehá bo mes kontra ITS i embaraso no-planiá? Abo i bo partner a yega di papia tokante kondon i antikonseptivo?

5. Bo ta sintibo sigur i respetá?

Bo meresé di ta ku un hende ku ta respetá bo límitenan, ta skuchabo i ta lagabo sintibo sigur. Si bo ta sintibo bou di preshon òf inkómodo, esaki ta un señal ku kisas bo no ta kla òf ku e persona no ta korekto pa bo.

6. Bo ta eduká tokante sèks & bo kurpa?

Komprondé kon sèks ta funshoná i kiko bo por ferwagt, por yudabo sintibo mas sigur. Si ainda bo tin preguntanan grandi òf miedu, lo por ta un bon idea pa sa mas promé ku bo tuma un desishon.

7. Bo sa ku bo por bisa nò?

Ta kla pa sèks ta nifiká tambe ku bo ta kla pa bisa nò si e situashon no ta sinti bon. Nunka bo no mester sinti ku bo ta “debe” un hende sèks.

Kòrda bon:

Ta abo so por disidí ki ora bo ta kla i no tin purá. Ta bon pa warda, kambia di idea òf tuma bo tempu. Si bo no ta sigur, esaki ta un señal ku bo mester para ketu i pensa mas riba loke ta mihó pa bo.