E kuater fasenan
E Siklo di Menstruashon ta un ritmo natural ku bo kurpa ta sigui tur luna i e ta dura mas o ménos 28 dia (ounke e por ta un tiki mas kòrtiku òf largu). E ta dividí den kuater fase, kada un ku kambionan úniko den kon bo por sinti i kiko ta pasando den…
Esaki ta kuminsá riba e promé dia di bo regla, ora bo kurpa ta deshasí di e furu di matris. Hormonanan ta abou i lo bo por sinti kansá i deseá na sosegá mas.
Komprondiendo bo regla
Menstruashon ta e parti di bo siklo ora bo kurpa ta deshasí di e furu di matris ku a akumulá den kaso di embaraso. Esaki ta sosodé ora ku no tin fertilisashon di niun webu. E resultado ta bo regla, un meskla di sanger, tehido i líkido ku ta sali fo’i bo kurpa dor di e vagina. Reglanan por lo general ta dura 3 pa 7 dia i e fluho por varia di leve te pisá. E ta un proseso kompletamente natural i kada siklo ta úniko!
Kon pa manehá bo regla
Pa manehá bo regla, bo por uza produktonan manera tuaya, tampòn òf kòpi di menstruashon. Tuaya ta pega na bo paña djabou pa apsorbá e fluho. Tampònnan ta tapanan chikí i apsorbente ku ta hinka den e vagina.
Kon pa uza un tampòn:
- Laba bo mannan promé
- Habri e tampòn i hink’é suavemente den bo vagina, uzando e aplikadó òf bo dedenan. Dirigié un poko mas ariba i buska un posishon kómodo
- Laga e hilu pafó pa bo por sak’é fásilmente
- Kambia e tampòn kada 4–8 ora pa evitá lèkmentu òf infekshon
- Si bo no ta sigur tokante un tampòn òf ta haña esaki inkómodo, esaki ta oké, purba diferente tamaño òf uza tuaya òf kòpi na su lugá. Semper skohe loke ta sinti bon pa bo!
E fase folikular ta kuminsá nèt despues di bo regla i ta manera un komienso nobo pa bo kurpa i mente. Durante e fase akí, e nivelnan di estrógeno ta subi konstantemente, yudando bo kurpa prepará pa ovulashon dor di laga un folíkulo nobo krese den bo ovario, ku ta kontené un webu. E impulso hormonal akí hopi biaha ta ponebo sintibo energisá, motivá i mas enfoká.
E ta un bon momentu pa plania, krea un tormenta di idea (brainstorm) òf kuminsá proyektonan nobo ya ku bo serebro ta kla pa kreatividat i solushoná problema. Bo por sintibo mas sosial i sigur tambe, loke ta hasi esaki e fase perfekto pa purba kosnan nobo òf konektá ku otronan. Bo tin ku mir’é manera bo kurpa su tempu pa yega na ful potensial i kresementu!
Meimei di siklo, bo kurpa ta lansa un webu. Esaki ta ora ku energia i konfiansa hopi biaha ta alkansá nan máksimo. Den e fase akí, bo por sintibo manera e mihó vershon di bo mes!
E Gran Lansamentu
Ovulashon ta e fase di bo siklo ora bo kurpa ta lansa un webu madurá for di un di bo ovarionan. Típikamente e ta sosodé den rondó di dia 14 den un siklo di 28 dia pero por varia dependiendo di durashon di bo siklo. Esaki ta bo tempu di mas fértil ora bo tin hopi mas chèns di sali na estado si tin spèrma einan.
Asin’akí e ta funshoná: Durante e promé mitar di bo siklo, estrógeno ta subi, yudando un folíkulo den bo ovario krese. Den e folíkulo tin e webu. Rondó di ovulashon, un oumento di hormona luteinizante (HL) ta kousa ku e folíkulo ta rementá i lansa e webu den e tubu di Falopio.
E webu despues ta biaha bai den direkshon di e matris. E por sobrebibí pa mas o ménos 12-24 ora.
Si spèrma topa ku e webu durante e rango akí, fertilisashon por tuma lugá. E webu fertilisá ta pega na e muraya di matris, inisiando embaraso. Si no tin fertilisashon, e webu ta disolvé i e furu di matris ta kai durante bo siguiente regla. Durante ovulashon, tin hende ta nota señalnan manera oumento di energia, sleim servikal kla i elástiko (manera blanku di webu) òf un oumento leve di temperatura di kurpa. Bo por sintibo mas sigur òf sosial tambe. Uza e tempu akí pa bai pa retonan, purba kosnan nobo òf konektá ku otronan.
Sa tokante ovulashon ta útil sea ku bo ta planiando pa embaraso òf simplemente bo ke komprondé bo kurpa mihó. Pa sigui bo siklo pa asina bo rekonosé ki ora ovulashon ta tuma lugá, bo por uza aplikashonnan, tuma nota di señalnan físiko òf purba kitnan di tèst di ovulashon.
Konosé bo siklo
Tantu menstruashon komo ovulashon ta prosesonan inkreibel ku ta mustra kon sorprendente bo kurpa ta. Dor di komprondé nan, bo por sintibo mas den sinkronisashon ku bo salú i empoderá pa hasi skohensianan ku ta kuadra ku bo bida.
Ki ora bo por sali na estado?
Bo por sali na estado durante e periodo fértil, ku ta e par di dianan promé ku òf despues di ovulashon i e dia di ovulashon. Spèrma por sobrebibí den kurpa te ku sinku dia i e webu por keda fertilisá pa mas o ménos 12-24 ora despues di ovulashon. Generalmente, ovulashon ta tuma lugá mas o ménos 14 dia promé ku bo siguiente regla den un siklo di 28 dia, pero esaki por varia. Tenementu di relashon seksual durante e periodo fértil akí ta oumentá e chènsnan di fertilisashon.
E fase luteal ta e tempu entre ovulashon i bo siguiente regla. Akinan bo kurpa ta relahá i prepará pa loke ta bai bin. Despues di ovulashon, bo nivelnan di progesterona ta subi. Esaki por ponebo sintibo mas trankil, mas reflektivo òf den nesesidat di konfortabilidat. Bo por anhelá na sierto kuminda, ke mas sosiegu òf ke keda kómodamente na kas. E ta un bon tempu pa kuido propio! Pensa riba bañonan kayente, skibi den bo diario òf aktividatnan relahante ku ta yudabo sinti bo ankrá. Si no tin embaraso, bo hormonanan ta kuminsá baha na final di e fase akí. Esaki por trese kambio di beis òf ménos energia, dunando señal ku bo regla ta na kaminda. Trata e fase akí manera un tempu pa bai trankil i kuida bo mes.
