Candidiasis

Señal- i síntomanan

Hopi biaha ta mas tantu hende muhé i mucha muhé ku ta eksperensiá molèster di tordo. Generalmente, mucha hòmber i hende hòmber no tin niun síntoma, pero por sosodé ku nan tambe lo por tin síntoma si.

Síntoma di tordo den bo vagina:

• Grawatashi
• Deskarga blanku ku no ta hole, kisas diki manera keshi cottage
• Bo vagina ta kòrá, hinchá i ta hasi doló
• Doló òf un sensashon di kimamentu, posiblemente solamente ora bo ta uriná òf tene relashon seksual

Síntoma di tordo na bo pénis:

• Kòrá, grawatashi òf iritashon
• Kueru seku i ku skama
• Bòlòbònchi- òf markanan kòrá
• Kaska blanku ku bo por raspa kita
• Doló ora di uriná

Síntoma ta mas probabel si bo kurpa su resistensia ta abou. Kisas pa motibu di strès, si bo ta diabétiko òf bo ta uzando remedi. Of djis promé ku bo regla.Talbes ta algu otro ta kousa bo síntomanan tambe. Kisas un ITS. Bishitá bo dòkter òf CSGC e ora ei pa un tèst di ITS.

Tratamentu

Si bo tin kualke síntoma, bo por haña tratamentu. Normalmente e dòkter lo duna bo un krema antifúngiko pa pone den bo vagina òf na bo pénis. Bo por haña  tablètnan antifúngiko tambe pa hinka den bo  vagina. Of bo por haña pulchi pa guli.

Kon pa prevení tordo

Bo por hasi lo siguiente pa yuda prevení un infekshon di tordo:

• Uza solamente awa lou pa laba bo vagina
• No uza habon, ducha vaginal, zeta òf krema
• No kuminsá tene relashon seksual ku no ta te ora bo ta kompletamente eksitá i bo vagina ta muhá

Tordo i embaraso

Un infekshon di fungo den e vagina lo no tin un efekto negativo riba un embaraso. Probablemente lo e sosodé òf regresá ku mas frekuensia, partikularmente durante e último lunanan di e embaraso.