relashon insaludabel
Ta importante pa sa ku kualke hende por hañ’é den relashonnan insaludabel i no ta semper nan ta kuminsá asina. Tin biaha, patronchinan di abuzu òf kòntròl ta desaroyá ku tempu, kual ta e motibu pakiko ta asina importante pa konfia bo instintonan i buska sosten si algu no ta sinti bon.
Si bo ta den un relashon insaludabel, òf si bo nota e señalnan akí den relashon di un otro hende, ta importante pa buska yudansa. Papia ku un amigu di konfiansa, miembro di famia òf profeshonal ku por ofresé guia.
Aki ta sigui algun señal di spièrtamentu di un relashon insaludabel: 10 señal
- Falta di rèspèt: Den un relashon insaludabel, un òf tur dos persona no por respetá otro su sintimentu-, límitenan òf individualidat. Esaki por paresé komo insulto, komentarionan di menospresio òf ignorá otro su nesesidatnan.
- Deshonestidat: Si konfiansa a kibra dor di mentira, skonde informashon, òf kòrtament’i orea, e por ta un señal di un relashon insaludabel. Konfiansa ta difísil pa rekonstruí unabes ku el a kibra i deshonestidat konstante ta krea inseguridat.
- Mal komunikashon: Den relashonnan insaludabel, komunikashon por ta limitá, pasivo-agresivo òf ineksistente. Un persona por sera, evitá di papia tokante asuntunan importante òf nenga di skucha e otro su sintimentunan.
- Kòntròl i manipulashon: Relashonnan insaludabel hopi biaha ta enserá ku un persona ta purba di kontrolá òf manipulá e otro. Esaki por inkluí bisabo kiko pa bisti, ku ken bo por papia òf kiko bo por hasi ku bo tempu. Manipulashon por inkluí tambe sintimentu di kulpa òf chantahe emoshonal.
- Keda sin respetá límitenan: Den un relashon insaludabel, un òf tur dos persona por ignorá límitenan di otro. Esaki por ta kualke kos for di preshoná bo pa hasi algu ku bo no ta kómodo kuné, te na invadí bo privasidat òf forsabo pa pasa tempu huntu ora bo mester di espasio.
- Yalusia i posesividat: Relashonnan insaludabel hopi biaha ta enserá yalusia òf posesividat eksesivo. Si bo partner ta konstantemente sospechoso, ta akusá bo di kosnan sin prueba, òf ta purba isolá bo for di amigunan òf famia, esaki por ta un señal di un kondukta kontroladó.
- Poder desbalansá: Den un relashon insaludabel, un persona por tin mas poder òf ta tuma tur e desishonnan, lagando e otro sintié indefenso òf sin atenshon pa skuch’é. Esaki por kondusí na un distribushon desigual di rèspèt, konfiansa i atenshon.
- Abuzu físiko òf emoshonal: Kualke forma di abuzu—sea físiko, emoshonal òf verbal—nunka no ta aseptabel den un relashon. Esaki ta inkluí dal, menasá, grita, uza nòmber ofensivo òf laga un hende sinti insigur òf ku e no ta bal nada.
- Falta di sosten: Si bo partner no ta sostené bo metanan, ambishonnan, òf bienestar emoshonal, e por krea sintimentunan di negligensia i inseguridat. Relashonnan insaludabel tambe por enserá ku un persona ta rebahá òf deskurashá e otro su soñonan.
- Patronchinan tóksiko: Den relashonnan insaludabel, komportashonnan negativo i patronchinan tóksiko ta keda ripití ku tempu. Esakinan por inkluí diskushon konstante, kulpa otro òf krea un ambiente di miedu òf insertidumbre.
Tuma kontakto ku:
918 : Liña di asistensia pa mucha i hóben, grátis i anónimo.
+5999 461 8103: Pa guia i sosten
Kòrda bon!
Bo meresé di ta den un relashon kaminda bo ta sintibo respetá, balorá i seif.
Otro tópiko
Sigui eksplorá bo salú seksual.
Relashon saludabel
Bo ta namorá i e sintimentu ta mutuo – pues awor bo ta den un relashon! Kon bo ta sòru pa boso pasa un dushi...
Kiko ta un kondon?
Un kondon ta un kapa di protekshon fini trahá di latèks òf otro material. Ta pon’é riba un pénis pará (kondon eksterno) òf hink’é den...
Kiko bo ke?
Si bo disidí di tene relashon seksual, kiko bo ke hasi? I kiko ta bo límitenan? Tur hende tin nan propio límite- i deseonan ora...
