Bo kurpa durante pubertat

Hormona

Ora bo yega pubertat, bo ta kambia. Bo kurpa ta kambia, pero tambe e manera ku bo ta sintibo. Tur e kambionan akí ta keda impulsá pa hormonanan. Hormonanan ta un tipo di mekanismo di kontrol den bo kurpa. Nan ta  regulá kon bo aparensia ta, kon bo ta sintibo i tambe kon bo kondukta ta.

Pechu

Bo pechunan ta kuminsá desaroyá entre edatnan di 8 pa 13 aña. Rápidamente pa algun, mas poko poko pa otronan.

Labia

E labia interno tambe ta krese. Nan ta rèk mas tantu ku labia eksterno.

Kabei

Kabei ta krese riba i rondó di bo labia. Kabei suave promé, ku despues lo bira mas diki i ikrùl. Bo ta haña kabei bou’i brasa tambe.

Kresementu aselerá

Hopi mucha muhé tin un kresementu aselerá rondó di edat di 12 aña. Nan por krese bira mas largu diripiente. Hopi biaha, mucha muhé ta kuminsá krese bira largu promé ku mucha hòmber. Mayoria biaha, un kresementu aselerá asina ta keda siguí pa bo promé regla. Bo figura tambe ta kambia. Bo hep, atras i bèlnan di pia ta bira mas desaroyá durante pubertat.

Menstruashon 

Mas o ménos entre 9 i 16 aña di edat, bo ta haña bo promé menstruashon. Mayoria mucha muhé ta haña nan promé menstruashon na edat di 12 aña.

Sodamentu

Bo ta soda mas durante pubertat, spesialmente bou di bo brasanan. Pues, lo bo por hole sodó mas tantu. Esaki ta kompletamente normal. Laba bo kurpa tur dia i kambia bo pañanan regularmente. Lo bo por uza desodorante tambe. Bo por kumpra diferente sorto na botika- i supermerkadonan.

Mancha

Hormona ta laga bo kueru bira mas zeta. Esaki ta produsí mancha. Bo ta sufri di esaki? Uza un zjèl di limpiesa pa hasi bo kueru ménos zeta. No uza habon normal. Hopi biaha esaki ta seka bo kueru muchu. Bo kueru ta  reakshoná dor di produsí mas zeta, loke ta produsí mas tantu mancha ainda.