Namorá i sali huntu

Promé ku bo transishon

Otro hende kisas no tin niun idea kiko ta pasando den bo kabes pa asina tantu tempu. Nan ta mirabo komo hende hòmber, pero en realidat bo ta hende muhé òf kontrali. Pero si bo ta namorá, i nan ta sinti meskos, kisas bo ke pa nan mira bo manera bo ta realmente.

Durante bo transishon

Bo por ta bibando kaba komo e persona ku bo ta sinti ku bo ta. Pero bo kurpa no ta loke otro hende ta ferwagt. Kisas bo ta un mucha hòmber òf un hòmber ku pechu i sin pénis. Of bo ta un hende muhé i ya bo tin pechu chikí pa motibu di e hormonanan, pero te ainda bo tin un pénis. Ki dia bo ta bisa bo date ku bo ta den transishon?

Despues di bo transishon

Bo kurpa ta kuadra mihó ku e manera ku bo ta mira bo mes. Awor bo ta preferá di simplemente sigui ku bo bida, komo e persona ku bo ta. Pero bo a pasa den hopi kos resientemente i esaki a formabo. I hopi biaha bo kurpa no ta eksaktamente meskos ku otro hende di e mesun sekso. Bo ta bisa e persona ku bo a namorá di dje ku bo ta transgénero? Of bo tin miedu ku bo frei lo no por simplemente mira bo komo un mucha hòmber òf un mucha muhé, un hòmber òf un muhé?

Ora bo ta bai sali ku un hende

• Buska un hende ku ta parse di tin un mente habrí.
• Pensa fo’i delantá kuantu bo ke konta nan tokante bo sintimentunan transgénero òf tokante bo kurpa.
• Pensa bon ki ora bo ke papia tokante esaki.
• Si bo ta insigur di bo mes,  kòrda semper: bo ta tremendo manera bo ta.

Ki ora bo por bisa nan?

Por ehèmpel:

• Si bo ta serando konosí ku un hende online, bo por pone esaki riba bo profil di date. Tene kuenta ku hende por reakshoná pa motibu di puru kuriosidat. Pensa bon kon lo bo dil ku esaki.
• Bo ta bisa nan riba bo promé sita.
• Bo ta bisa nan despues ku bo tabatin 2 sita kaba.
• Bo ta bisa nan promé ku bo sunchi òf karisiá.

Si bo bisa nan

• Tene kuenta ku bo date mester kustumá ku e idea. Nan por kuminsá haña duda tokante nan propio identidat òf preferensia seksual, òf bira konfundí. Duna e otro persona tempu.
• Si bo date no ta reakshoná bon riba bo storia, stòp di sali kuné. Bo meresé un hende ku gusta bo manera bo ta.
• Hopi debesenkuando, un hende por reakshoná di forma agresivo. Si bo ta planiando pa konta nan tokante bo situashon, sòru pa e ta na un lugá kaminda otro hende ta presente, manera den un restorant.
• Duna bo date un link pa e página akí, kaminda tin tep pa hóbennan ku ta namorá di un persona transgénero.

Papia ku otro hóbennan ku ta den transishon, òf a transishoná kaba, tokante kon nan ta dil ku salimentu ku otronan. Por parse manera kos ku sali ku un hende semper lo ta difísil pa un transgénero, pero sigur no ta asina! Hopi hende transgénero ta felismente namorá. Bo por ta diferente, pero bo tin mag di ta ken bo ta.

Den transishon

Laga nos bisa ku bo ta den un relashon. Bo frei sa di bo sintimentunan transgénero, pero awor bo a disidí ku bo ta bai tuma akshon, bo ta bai transishoná. Esaki por ta bastante konfuso pa bo partner. Kon bo ta dil ku esaki?

• Papia bon tokante esaki ku bo partner. Kisas bo frei tin hopi pregunta, pero e no ta hasi nan.
• No pidié pa tene esaki pa su mes. E ta un sekreto muchu grandi pa karga bo so ku bo so! Disidí huntu ken si i ken no mester sa.
• Tuma tempu pa boso tur dos kustumá kuné. Bo por a karg’é pa añanan largu, pero bo frei si no a hasié.
• Bo partner no por kustumá kuné? Of bo partner ta mira bo ainda komo un hende muhé miéntras ku bo ta un hòmber awor, òf al kontrali? Despues di un ratu, bo por realisá ku e no ta funshoná entre boso dos. Den e kaso ei, tin biaha ta mihó pa kibra ku otro.