Na estado òf nò?

Ménos ku 5 dia pasá?

Bo a hasi sèks no-protehá ménos ku 5 dia pasá? Lesa kiko bo por hasi ainda pa prevení un embaraso.

Mas ku 5 dia pasá?

Bo a hasi sèks no-protehá mas ku 5 dia pasá? Bo no por prevení un embaraso mas e ora ei. Bo ke chèk si bo ta na estado òf nò? Lesa akinan kon esaki ta bai.

1. Warda wak si bo tin bo regla promé

Warda te e fecha ku bo sa tin bo regla normalmente. Dikon? Pasó, te na e momentu ei, lo no tin sufisiente hormona di embaraso den bo kurpa pa hasi un tèst di embaraso.

• Bo tabatin bo regla manera normal? Bo no ta na estado e ora ei
• Bo a salta bo regla? Bo ta ‘lat’? Talbes bo ta na estado e ora ei. Den tal kaso, hasi un  tèst di embaraso

No lubidá! Si bo ta na estado,  bo ta pèrdè un tiki sanger tin biaha. Ke men, bo a pèrdè un tiki sanger, pero bo no ta sigur si bo ta menstruando? Hasi un tèst di embaraso pa mas sigur e ora ei. 

2. Hasi un tèst di embaraso

Bo por hasi un tèst di embaraso for di e promé dia ku bo menstruashon mester a kuminsá. Ke men, for di e promé dia ku bo ta lat. Tin diferente manera pa hasi un tèst:  

• Bo por kumpra un tèst di embaraso na botika òf Fundashon Famia Plania. E tèst ta fásil pa bo mes hasi. Bo ta dep e stroki di tèst den bo muestra di urina (òf bo ta uriná riba e stroki) pa algun sekònde, preferiblemente den oranan di mainta. Resultado di e tèst ta visibel despues di algun minüt. Lesa e instrukshonnan promé. E ora ei bo sa sigur si bo ta hasiendo e diferente pasonan den e sekuensia korekto. 
• Bo por laga hasi un tèst di embaraso na ofisina di bo dòkter. No tene miedu ku dòkter lo informá bo mayornan mesora. Tur dòkter tin un deber di konfidensialidat i por bisa bo mayornan algu solamente si bo ke pa nan hasi esaki.

Resultado di tèst

• E tèst ta positivo? Bo ta na estado e ora ei.
• E tèst ta negativo? Probablemente bo no ta na estado, pero esaki no ta kompletamente sigur. Den kuminsamentu, tin biaha no ta bon kla ainda for di bo urina si bo ta na estado. Ta konsehabel pa hasi un tèst mas despues di algun dia. 

Pone atenshon na bo kurpa

Si bo ta na estado, lo bo nota kambionan físiko:

• Pechunan doloroso: Esaki por indiká un embaraso, pero por sosodé tambe pasobra bo ta pasando den pubertat òf tin síntomanan premenstrual.
• Kansansio: Esaki por indiká embaraso, pero e por tin un otro kousa tambe.
• Walment’i stoma: Si bo tin algun dia ta sinti walment’i stoma mainta, ta konsehabel pa hasi un tèst di embaraso.
• Bo menstruashon a stòp.
• Bo ta pèrdè un tiki sanger so. Tin biaha mucha muhénan ta pèrdè un tiki sanger ora nan ta na estado.

Fabor tene kuenta ku lo siguiente: bo por ta na estado sin ripará nada. P’esei, paga bon tinu si bo ta haña bo menstruashon tur luna. I semper tene relashon seksual ku protekshon naturalmente.