Píldora di e mainta despues (Morning-after pill)

Kiko ta un píldora di e mainta despues ?

E píldora di e mainta despues ta un píldora ku ta prevení bo di sali na estado dor di retrasá ovulashon. Hopi biaha ta referí na dje komo antikonseptivo di emergensia, òf pa e nòmber di marka, Plan B. Si bo tuma e píldora akí, e sèlnan di sperma no ta topa ku un sèl di webu. E ora ei fertilisashon no por tuma lugá. E píldora di e mainta despues ta un solushon di emergensia, pues no antikonseptivo.

Fabor tene kuenta ku esaki: e no ta 100% eksitoso

No ta semper un píldora di e mainta despues  ta prevení embaraso. Si un webu a keda lansá kaba, e píldora di e mainta despues no por hasi nada mas. Un sèl di sperma por fertilisá e webu e ora ei.

Na ki momentu mester tuma e píldora di e mainta despues?

Si bo tuma e píldora di e mainta despues denter di 12 ora despues di sèks, bo tin e mihó chèns pa no sali na estado. Un tiki mas lat tambe ta posibel. Pero mas lihé mas mihó.

2 tipo 

• Postinor i Norelvo: ta traha te ku 3 dia òf 72 ora despues di sèks no-protehá
• Ella One: ta traha te ku 5 dia òf 120 ora despues di sèks no-protehá

Esakinan por kosta entre 9 pa 23 florin dependé di e tipo òf marka ku bo uza. 

Tep: Kompartí e gastunan ku bo partner seksual

Kòrda bon! 

Si bo saka denter di 3 ora despues ku bo a tuma e píldora di e mainta despues, bolbe tuma un otro mas pronto posibel. 

Unda por kumpra píldora di e mainta despues ?

Por kumpra píldora di e mainta despues na botikanan. Bo no mester di un reseta di bo dòkter. Por hañ’é na Fundashon Famia Plania tambe.

Anochi òf riba djadumingu?

Bo mester di un píldora di e mainta despues part’i anochi òf riba djadumingu?

Na Kòrsou, semper tin 2 botika habrí part’i anochi òf riba djadumingu. E botikanan ta hasi esaki bùrt pa bùrt. Bo por haña e skema riba e siguiente link, Botika Na Warda  òf dor di sigui e siguiente página di Facebook, Botika Na Warda Caribe.  

Tep
Sòru pa bo tin un píldora di e mainta despues na kas semper. E ora ei lo bo ta prepará si algu bai robes ku e antikonseptivo. Kòrda chèk e fecha di vensementu.

Bo ta tumando kualke remedi?

Bo ta tumando medikamentu pa trata HIV, epilepsia òf tuberkulósis? 

Of kualke remedi di yerba ku ta kontené St John’s Wort? 

Si bo a tuma kualke un di esakinan den e último 4 simannan, e píldora di e mainta despues lo ta ménos efektivo. E ora ei lo ta mas seif pa laga pone un IUD di emergensia. Esaki ta redusí e chèns di un embaraso no-planiá.

Bo tin un kondishon di higra òf tripa? Of bo ta tuma antiásido?

E ora ei, puntra bo dòkter ki tipo di antikonseptivo di emergensia ta mihó pa bo.  

Alergia

Si bo ta alérgiko pa kualke kos den e píldora di e mainta despues, bo no mester tum’é. Lesa mas tokante esaki den e foyeto di instrukshon òf puntra bo botikario. Nan por duna mas informashon tokante kon sierto remedi lo por redusí efektividat di e píldora di e mainta despues.

Kiko ta un IUD di emergensia?

Un IUD di emergensia ta un IUD di koper ku ta keda hinká den bo matris i ku ta prevení embaraso. Bo por laga pone un IUD di emergensia te ku 5 dia despues di a hasi sèks no-protehá. E IUD di koper ta asta mas efektivo ku e píldora di e mainta despues den prevenshon di embaraso. I por lag’é na su lugá pa 5-10 aña, pa bo ta protehá pa hopi tempu.

Un IUD di koper ta stòp un webu di keda fertilisá. Si un webu keda fertilisá tòg ainda, e ora ei e IUD ta sòru pa e no keda implantá den e membrana mukoso di e matris.

Bo por laga sea bo mes dòkter pone un IUD di emergensia òf bo por laga hasié na Fundashon Famia Plania. 

Muchu lat pa e píldora di e mainta despues òf un IUD?

E sèks no-protehá tabata mas tantu ku 5 dia pasá? E ora ei un píldora di e mainta despues òf un IUD di koper lo no ta útil mas. 

• Warda pa wak si bo ta na estado. Lesa kon pa haña sa si bo ta na estado 
• Bo no ta na estado? Uza antikonseptivo di awor padilanti, ya e ora ei bo no mester prekupá bo kabes mas
• Bo antikonseptivo sa bai robes hopi biaha? Pensa riba un otro método. Lesa tokante bo opshonnan akinan
• Bo ta na estado? E ora ei bo tin di skohe awor si bo ke sigui ku e embaraso – papia esaki ku bo dòkter. Bo por papia esaki tambe ku dunadónan di kuido na CSGC

Eksposishon potensial na ITS?

Laga nan tèstbo riba ITS na CSGC òf bishitá bo dòkter. Si bo mester di píldora di e mainta despues, bo no a hasi uzo di un kondon. Of talbes algu a bai robes ku e kondon. Ke men, lo bo por a keda infektá ku un ITS. Bai hasi un tèst pa bo ta sigur.