Retonan físiko durante sèks

1. Eksitashon

Si bo no ta sufisientemente lubriká:

Tin biaha, falta di lubrikashon natural den e vagina por hasi sèks inkómodo. E bon notisia ta, ku bo por drecha esaki dor di tuma bo tempu i relahá. Sòru pa bo ta eksitá i no hasi kos purá purá. Si bo ta haña bo mes muchu seku ainda, konsiderá pa uza un lubrikante a base di awa pa hasi kosnan mas kómodo.

Kon pa mehorá lubrikashon:

• Relahá i disfrutá di e hungamentu preliminar—esaki ta yuda prepará bo kurpa
• Enfoká riba kon bon e mishimentu ta sinti i laga bo partner sa kiko ta funshoná pa bo
• No hansha kos; tuma bo tempu pa bo sinti bo mes kómodo

Si bo ta luchando ku un erekshon:

Ta normal pa tin problema ku erekshon de bes en kuando. E por ta relashoná ku strès, kansansio, òf asta alkohòl. Tanten ku bo ta bon físikamente, normalmente no tin motibu pa preokupá. Si esaki ta sosodé hopi biaha tuma un pousa i bolbe purba despues.

Kon pa mehorá un erekshon:

• Relahá i enfoká riba e sensashonnan plasentero
• Sòru pa bo ta bon sosegá i evitá alkohòl òf droga
• Hasi kosnan trankil i komuniká ku bo partner

Kòrda bon!

Si bo ta pensando pa uza potensiadónan seksual manera HoneyPack, ta importante pa papia ku un dòkter promé. Hopi biaha, e produktonan akí tin ingredientenan aktivo ku mester di un reseta i nan por brua ku kualke otro remedi ku bo ta tumando òf afektá bo salú na maneranan ku talbes bo no ta ferwagt.

2. Doló durante sèks: E no mester hasi doló

Doló pa hende muhé:

Si bo eksperensiá doló durante sèks, spesialmente e promé biaha, e ta generalmente debí na tenshon, nèrvio òf falta di lubrikashon. E mihó kos pa hasi ta stòp si e ta hasi doló i komuniká ku bo partner.

Kousanan komun di doló:

• Falta di lubrikashon por kousa un sensashon di kimamentu. Warda te ora e ta kompletamente lubriká promé ku penetrashon
• Tenshon den e múskulonan di e suela pélviko dor di ta tenso por kousa molèster
• Bo no ta kompletamente eksitá. Bo vagina ta bira mas profundo i hanchu ora e ta eksitá
• Doló profundo paden por nifiká ku bo servíks ta haña sla. Purba diferente posishon òf evitá penetrashon profundo
• Un infekshon di fungo por kousa doló, huntu ku grawatashi, aspekto kòrá i deskarga diki

Tep pa prevení doló:

• Tuma tempu pa bo ta kompletamente eksitá i relahá
• Uza hopi lubrikashon pa evitá frikshon
• Komuniká ku bo partner tokante kiko ta sinti bon òf inkómodo

Sèks doloroso pa hende hòmber

Doló den e pénis: 

Tin hende hòmber ta eksperensiá doló durante sèks, ku por ta debí na kousa físiko manera bachi di pénis pèrtá, iritashon, òf hiperstimulashon. Ta importante pa tuma pousa i skucha bo kurpa.

Kousanan komun di doló:

• Bo por tin un ITS. Hasi un tèst serka bo dòkter òf na Sentro pa Salubridat Seksual Kòrsou (CSGC).
• Un bachi di pénis pèrtá òf frenio kòrtiku por kousa molèster durante un erekshon.
• Masturbashon òf sèks frekuente òf falta di lubrikashon, por iritá kabes di e pénis. Bai poko poko i bishitá bo dòkter si ta nesesario.
• Hipersensibilidat di e kabes di pénis por kousa doló. Purba di mantené e bachi di pénis riba e kabes durante hungamentu preliminar i komuniká ku bo partner.
• Keda pará pa muchu largu por kondusí na “webu blou.” Purba yega na un orgasmo mas lihé.
• Sèks anal sin lubrikashon por ta doloroso. Semper uza hopi lubrikante i si e ta hasi doló, sali afó pokopoko.

Tep pa prevenshon di doló:

• Bai pokopoko si kosnan ta sinti inkómodo
• Sòru pa bo ta konsiente di bo kurpa i komuniká ku bo pareha
• Si e ta persistente òf doloroso, konsiderá pa bishitá un dòkter pa konseho

3. Doló durante sèks anal

Si bo eksperensiá doló durante sèks anal: 

Ta komun pa hende sinti molèster durante sèks anal, spesialmente si nan no a uza sufisiente lubrikashon, no ta relahá òf e penetrashon ta muchu profundo. No tene miedu di stòp i purba atrobe despues si e no ta sinti bon.

Kon pa hasié mas kómodo:

• Uza hopi lubrikashon
• Bai pokopoko i relahá
• Komuniká ku bo partner tokante kiko ta sinti bon i kiko nò

Kòrda bon!

Salú seksual ta personal i úniko pa tur hende. Loke ta funshoná pa un persona kisas no ta funshoná pa un otro. E kos di mas importante ta pa sintibo kómodo i komuniká abiertamente ku bo partner tokante bo deseo-, nesesidat- i límitenan. Si algu no ta sinti bon, ta oké pa stòp i dal un stap atras. Bo komodidat i bienestar semper mester ta na promé lugá.