Proseso di Transishon

Kuminsá transishoná

Esaki ta loke bo por hasi pa kuminsá bo biahe di transishon:

• Pidi hende rondó di bo pa yama bo ‘he’, she’, ‘they’ ora bo a disidí kon bo ke pa nan referí na bo. Kisas bo no ke pa nan uza ningun di esakinan, i esaki tambe ta bon.
• Skohe un nòmber nobo.
• Hunga bai bin ku nòmber i pronòmber. Kisas bo por hasi esaki ku un amigu di konfiansa, òf asta djis den bo imaginashon. Esaki lo dunabo e chèns di saka afó kiko ta sinti bon pa bo. 
• Kambia bo aparensia, por ehèmpel ku bistuario, makiyahe òf estilo di kabei.
• Mas despues lo bo ke kuminsá tuma hormona i operá pa kambia bo kurpa.

Tratamentu di reasignashon di género

Kisas bo tin un deseo profundo pa kambia bo kurpa ku hormona i sirugia. Ta  yama esaki Tratamentu di Reasignashon di Género (TRG). Esaki no ta solamente tokante bo genitalnan, pero tambe tokante bo kresementu di kabei, bos i distribushon di vèt. Tin dos aserkamentu pa TRG; Terapia di Reemplaso di Hormona (TRH) i sirugia di afirmashon di género.

Terapia di remplaso di hormona

Na Kòrsou, reasignashon di género ku hormona ta disponibel pa personanan di 18 aña bai ariba. E ta enserá referensia na vários profeshonal di salú. Na promé lugá, bo ta papia di esaki ku bo dòkter di kas. Nan lo referí bo na un sikólogo. Despues di evaluashon dor di e sikólogo, bo por haña un referensia pa e Internista (dòkter) na Curaçao Medical Center. Huntu, boso lo papia tokante boso plan di tratamentu hormonal. Normalmente, Banko di Seguro Sosial (SVB) ta kubri e plan di tratamentu akí. Pero pa mas sigur, ta un bon idea pa papia tokante esaki ku bo dòkter i proveedó di seguro. 

Ki tipo di hormona ta uza?

Tin dos tipo di hormona ku ta uza na Kòrsou pa hende ku ke transishoná. Nan ta disponibel solamente pa hendenan di 18 aña bai ariba:

• Hormonanan ku ta suprimí bo mes hormonanan seksual: Hopi biaha ta duna mucha muhénan trans un remedi ku ta suprimí testosterona; mucha hòmbernan trans ta haña un remedi ku ta stòp  menstruashon.
• Hormonanan di sekso krusá: Mucha muhénan trans i hende muhé ta haña estrógeno i mucha hòmber i hende hòmber trans ta haña testosterona.  

Kiko por ferwagt pa mucha muhé i hende muhé trans?

Ora bo kuminsá tuma hormona, tur tipo di kos ta kambia den bo kurpa. Ora bo tuma estrógeno i un blokeo di testosterona, hopi biaha e siguiente kosnan ta sosodé:

• Bo ta desaroyá pechu. Esaki ta sosodé pokopoko serka algun hende, rápidamente serka otronan. Tin hende no ta desaroyá pechu muchu grandi, miéntras ku otronan si.
• Bo por sinti ménos gana di tene relashon seksual.
• Bo ta haña ku ta mas difísil pa haña un erekshon òf bo no por haña un ètòl.
• Despues di tempu, bo no ta eyakulá mas. Un kantidat limitá di líkido por sali for di bo pénis ainda.
• Bo testikulonan ta krem.
• Loke normalmente no ta kambia ta bo orientashon seksual.

Ta bon pa sa ku tur hende ta reakshoná otro riba hormonanan. Kon bo kurpa ta kambia por varia un poko i e ta tuma tempu.

Kiko por ferwagt pa mucha hòmber i hende hòmber trans

Ora bo kuminsá tuma hormona, tur sorto di kos ta kambia den bo kurpa. Ora bo tuma testosterona, lo siguiente ta sosodé:

• Bo ta desaroyá un barba i kabei di kara.
• Bo bos por bira mas profundo.
• Bo por nota kambionan den bo deseo seksual. Den e fase inisial di tumamentu di testosterona, e por oumentá. Por lo general esaki ta nivelá ku tempu.
• Bo klitóris ta krese, hopi biaha ta referí na esaki komo ‘’kresementu di abou’’. Esaki por sosodé pokopoko òf lihé. I serka algun hende e klitóris ta krese mas ku serka otronan.
• Bo klitóris por bira poko duru ora bo ta seksualmente eksitá. Ora bo klitóris krese, lo bo nota esaki un tiki mas.
• Loke normalmente no ta kambia ta bo orientashon seksual.

Ta bon pa sa ku tur hende ta reakshoná otro riba hormonanan. Kon bo kurpa ta kambia por varia un poko, i e ta tuma tempu. 

Si e ta desepshonante

Hopi hóben ta kontentu ku e kambionan. Mucha hòmber i hende hòmber trans hopi biaha ta pensa ku ta great pa ta mas den e estado di ánimo pa sèks. Mucha muhé i hende muhé trans hopi biaha ta aliviá ku gradualmente nan ta stòp di haña erekshonnan spontan.

E por ta desepshonante tambe. Kisas kosnan a kambia ménos òf ménos lihé ku lo bo a spera.

• Por ehèmpel, komo un hòmber trans bo a spera ku lo bo tabata hopi mas den estado di ánimo pa sèks, pero bo ta nota ku esaki no ta e kaso.
• Komo un hende muhé trans bo tabata anhelá pa tin pechu, pero kasi no tin kresementu.

Di otro banda, bo por haña fastioso ku sierto kosnan ta kambia.

• Komo un muhé trans, por ehèmpel, bo ta pensa ku ta un lástima ku bo ta ménos interesá den sèks i ku bo no ta haña un erekshon mas òf ku bo no ta eyakulá mas.
• Komo un hòmber trans bo deseo pa sèks ta kue bo fo’i base i bo no sa kon pa dil kuné.

Kiko bo por hasi?

• Bo por warda un ratu i wak kon kosnan lo desaroyá. Ta importante pa no balotá e tempu ku bo kurpa mester pa desaroyá i ahustá na bo tratamentu di hormona. Ku tempu, lo bo por kuminsá mira e kambio ku bo tabata deseá. 
• Papia tokante esaki ku bo sikólogo i bo dòkter. Hasi pregunta i disidí riba solushon huntu.
• Papia tokante esaki ku organisashonnan di sosten ku tin konosementu tokante seksualidat i/òf salú mental, manera FOKO, Yuda bo Yu i Skuchami. 
• Eventualmente bo por disidí di stòp di tuma hormona. Bo por sigui biba bo bida komo bo sekso deseá kuantu bo ke. Of komo un persona ku ta mas meimei, si esei ta kumbiní bo mihó. Bo no por bòltu bèk sierto kambio na bo kurpa. Pero bo kurpa lo no kambia mas ku el a kambia kaba.

Sirugia pa Afirmashon di Género

Sirugia pa afirmashon di género ta un manera pa kambia e kurpa pa kuadra ku identidat di género di un persona. Esaki por inkluí krea òf remodelá partinan di kurpa manera pechu, pénis, vulva, òf otro karakterístikanan pa yuda un hende sinti mas kómodo den su mes kueru. Ta plania e proseso kuidadosamente ku dòkternan, i kada persona su trayekto ta úniko, enfokando riba loke ta sinti korekto pa nan.

Reasignashon di género pa medio di sirugia genital no ta disponibel na Kòrsou. Sinembargo, e ta aksesibel otro kaminda denter di Reino Hulandes. Si bo tin un deseo profundo pa reasignashon di género kirúrgiko, papia tokante e posibilidatnan ku bo sikólogo òf dòkter di kas.  Tene na kuenta ku sigui e kaminda aki por ta un proseso largu, ku hopi biaha ta enserá tempu di espera supstansial i e nesesidat pa kubertura di seguro spesífiko pa manehá gastu. 

Papia ku otronan ku a hasi sirugia pa afirmashon di sekso. Organisashonnan manera FOKO i Curaçao Pride lo por yudabo konektá ku hende ku tabatin e eksperensia akí. 

Bo ke papia òf mester di yudansa?

Bo tin sintimentunan transgénero? Papia di dje ta un alivio! Kisas ku un adulto di konfiansa òf un hende ku bo konosé, ku otro hóben transgénero, òf ku un hende di organisashonnan di sosten manera FOKO òf Curaçao Pride.