Kiko ta límite?
Límitenan ta e restrikshon- òf reglanan ku bo ta pone pa bo mes i otronan pa sòru pa bo sintibo sigur, kómodo i respetá. Nan ta yudabo disidí kiko bo ta di akuerdo kuné i kiko bo no ta di akuerdo kuné den diferente situashon. Límitenan por ta físiko, emoshonal òf te asta digital. Bo límitenan lo varia pa persona. Por ehèmpel, e límitenan ku bo a krea pa un hende straño òf un konosí por ta diferente for di bo límitenan pa un amigu òf miembro di famia.
Tipo di límite:
- Límitenan físiko: Esakinan ta enserá bo espasio i kurpa personal.
Por ehèmpel:
- Disidí si bo ta sintibo kómodo ku brasa òf un sunchi.
- Laga otronan sa si bo no ke pa hende mishi ku bo na un sierto manera.
- Límitenan emoshonal: Esakinan ta protehá bo sintimentu- i pensamentunan.
Por ehèmpel:
- Bisa “Mi no ke papia riba e asuntu ei aworaki” si un sierto tópiko ta hasibo inkonfortabel.
- Pidi hende pa respetá bo sintimentunan òf opinion.
- Límitenan digital: Esakinan ta enserá kon pa uza teknologia, manera medionan sosial.
Por ehèmpel:
- Disidí ken por siguibo òf manda mensahe pa bo online.
- Laga otronan sa si bo no ke pa kompartí bo potrètnan sin bo pèrmit.
Dikon límitenan ta importante?
- Nan ta tenebo seif: Límitenan ta yuda protehá bo di situashonnan ku ta lagabo sinti insigur òf inkonfortabel.
- Nan ta konstruí relashonnan saludabel: Ora hende ta respetá bo límitenan, e ta demostrá ku nan tin atenshon pa bo sintimentunan.
- Nan ta siña hende rèspèt: Fiha límite ta yuda otronan komprondé kon bo ke pa hende tratabo i e ta siñabo pa respetá nan límitenan tambe.
Kultura i límitenan
Hopi di nos ta lanta sin siña ku nos tin derechi di pone límitenan relashoná ku mishimentu físiko, asta pa ku miembronan di famia. Esaki por hasié mas difísil pa stablesé límitenan personal mas despues den bida i por krea un ambiente kaminda muchanan ta sinti preshon pa aseptá interakshonnan físiko ku ta hasi nan inkómodo.
Tene kuenta ku bo por bisa nò i bo por papia tambe tokante bo límitenan i reflehá riba e sintimentu inkómodo akí ku bo famia i amigunan.
Kon pa fiha límite:
- Bo mester ta bon kla: Bisa kiko bo ta kómodo kuné i kiko nò. Por ehèmpel, “Por fabor no brasami sin puntra.”
- Uza Deklarashonnan ku “Mi”: Esaki ta yuda ekspresá bo sintimentunan sin kulpa niun hende. Por ehèmpel, “Mi ta sinti mi inkómodo ora…”
- Keda firme: Si un hende no ta respetá bo límite, ta bon pa ripití esaki òf saka bo mes for di e situashon.
Kòrda bon!
Ta bon pa bo tin límite, i bo meresé pa hende respetá nan. Si un hende surpasá bo límitenan, papia ku un adulto di konfiansa, manera un mayor, maestro òf trahadó sosial di skol. Tambe tin organisashonnan di sosten ku por ofresé guia manera Bos di Hubentut or Ayudo pa Mucha i Hóben.
Otro tópiko
Sigui eksplorá bo salú seksual.
Kiko pa hasi si bo mira kondukta indeseá
Si bo mira un hende surpasá e límitenan di un otro persona, bo por intervení – pero bo mes seguridat semper mester ta na promé...
Kiubo di e otro persona su límitenan?
Konsentimentu ta un kaya di dos direkshon. Meskos ku bo límitenan ta importante, di nan tambe ta.
Protehá bo mes & respetá otronan
Nunka no ta bo falta si un hende surpasá bo límitenan, pero lamentablemente, e por sosodé. Aki ta sigui algun manera pa protehá bo mes,...
