Bo kurpa durante pubertat

Kresementu di kabei

Entre e edatnan di 11 i 16 aña, kabei ta kuminsá krese na diferente lugá. Suave na promé instante, despues mas duru. Kabei ta krese riba bo lep di ariba, bo band’i kara, bou’i bo brasa, rondó di bo pénis i riba bo skrotem. Hopi despues, kabei ta krese riba bo pechu tambe.

Kresementu

Bo tin mas chèns di krese di forma aselerá rondó di edat di 14 aña: Bo por kuminsá krese lihé. Bo skoudernan ta bira mas hanchu, meskos ku bo pechu. Mucha muhé ta kuminsá krese mas trempan ku mucha hòmber; mas o ménos den kareda di 12 aña di edat. 

Sodamentu

Durante pubertat bo por soda mas, spesialmente bou di bo brasanan i esaki por hole. E ta kompletamente normal. Ta un bon idea pa bo laba bo kurpa tur dia i kambia bo paña regularmente. Hasi uzo di un desodorante tambe ta yuda.

Mancha

Hormonanan ta laga bo kueru bira un tiki mas zeta. Esaki ta produsí mancha. Bo ta sufri di esaki? Laba bo kara ku un zjèl di limpiesa pa hasi bo kueru ménos zeta. No uza habon normal. Hopi biaha esaki ta seka bo kueru muchu. Laba bo kara ku un zjèl di limpiesa pa hasi bo kueru ménos zeta. No uza habon komun: hopi biaha e ta seka bo kueru muchu. Bo kueru ta reakshoná dor di produsí mas zeta ainda, loke ta resultá den mas mancha ainda.  

Kibramentu di Bos

Rondó di edat di 14 aña, bo bos ta bira mas profundo i bo por produsí algun zonido straño. Esaki ta loke nos ta yama ‘kibramentu di bos’. Afortunadamente, esaki ta temporal; despues di un ratu, tur kos ta regla su mes.  

Pénis i skrotem

Bo pénis i skrotem ta krese durante pubertat. Bo skrotem ta bira mas grandi promé, despues bo pénis. Bo pénis ta bira mas gordo promé, despues mas largu. Mayoria mucha hòmber tin un pénis adulto na edat di 15 aña.

Erekshon

Un erekshon ta nifiká ku bo pénis ta lanta para. Bo pénis ta bira mas duru i un tiki mas grandi. Ora bo ta seksualmente eksitá òf speshá, bo ta haña un erekshon. Ku un pénis steif ta mas fásil pa hasi sèks. Ta difísil pa hinka un pénis slap den un vagina.

Erekshon spontan

Tin bia bo ta haña un erekshon ora bo no ta seksualmente eksitá i ora bo no ke pa esaki sosodé. Esaki por ta bergonsoso, pero no preokupá, despues di un ratu e erekshon spontan akí ta baha.

Promé eyakulashon

Un momentu entre 11 i 16 aña di edat, bo ta haña bo promé eyakulashon. Tin biaha esaki ta sosodé den forma di un ‘soño muhá’: bo tin un eyakulashon spontan miéntras bo ta drumi. Bo ta ripará ku bo kama ta un tiki húmedo ora bo lanta. Esaki no ta nifiká ku bo a pishi kama, pero ku bo a haña bo promé eyakulashon. 

Semen

Ta yama e líkido di eyakulashon semen òf gustu. Semen ta konsistí di un líkido blanku pèkèpèkè ku ta kontené miónes di spèrma. Kada kurpa maskulino (for di pubertat padilanti) i tur hòmber tin semen.