Prevenshon di HIV
Bo ta bin na remarke pa un tratamentu di PEP si resientemente bo tabatin relashon seksual kaminda tabatin un chèns di haña HIV. Kuminsá mas lihé posibel ku e tratamentu.
Si bo mester haña akseso na PEP durante oranan di ofisina, djis tuma kontakto ku bo Dòkter di Kas. Bo dòkter di kas lo dunabo un karta di referensia e ora ei pa e Departamentu di Emergensia di Curaçao Medical Center (CMC) kaminda bo por haña akseso na PEP. Si ta despues di 5or di atardi, durante fin di siman, òf dianan di fiesta, akudí serka e dòkter na warda, Huisartsenpost (HAP). Banko di Seguro Sosial (SVB) ta kubri PEP.
Kiko ta PEP?
- PEP ta un tratamentu di 4 siman ku remedi kontra HIV
- PEP ta realmente redusí e chèns ku bo ta haña HIV, pero no tin garantia ku bo ta keda HIV-negativo
- Kuminsá ku e tratamentu di PEP mas lihé posibel despues di un potensial eksposishon. Preferiblemente denter di 2 ora ku bo a tene relashon seksual i no mas tardá ku 72 ora despues
- Mas lihé bo kuminsá, mas grandi e chèns di éksito
PrEP ta prevení infekshon ku HIV
PrEP ta remedi ku ta sòru pa bo no haña HIV. PrEP no ta protehá kontra otro ITS, solamente HIV. Si tin un chèns mas grandi ku bo ta haña HIV, papia ku bo dòkter pa sa si PrEP ta bon pa bo.
Kiko ta PrEP?
- PrEP ta un píldora ku ta protehá bo kontra HIV. Si bo tuma PrEP na e manera korekto, lo bo no haña HIV. Ni si bo tene relashon seksual ku un hende ku tin HIV.
- Bo por tuma bo píldora di PrEP tur dia. Un otro opshon ta pa tuma e remedi promé i despues di sèks. Papia esaki ku bo dòkter òf enfermero i skohe kiko ta mihó pa bo.
- PrEP ta seif i tin tiki efekto sekundario.
- Pa haña akseso na PrEP, bishitá bo dòkter di kas i buska un referensia serka e spesialista na Curaçao Medical Center (CMC).
- Bo dòkter lo monitoriá bo salú miéntras bo ta tumando PrEP.
Kon efektivo PrEP ta?
PrEP ta hopi efektivo pa protehá bo kontra HIV, basta bo tuma e píldoranan na e manera i momentu korekto.
Ta difísil pa uza PrEP?
E píldora mes ta chikitu i normalmente fásil pa guli. Bo mester uz’é tur dia òf ki ora ku bo hasi sèks. Si bo no hasi esei, e no ta protehá bo korektamente.
Bo por uza PrEP na 2 diferente manera: 1 píldora pa dia òf 4 píldora ora bo hasi sèks. Disidí kiko ta mas fásil pa bo. Bo por kambia entre métodonan tambe.
Pa ken PrEP ta?
PrEP ta pa hende ku por benefisiá di protekshon adishonal kontra HIV. Partikularmente si bo ta hasi sèks sin un kondon. Kòmbersá ku bo dòkter si PrEP ta algu ku bo mester konsiderá.
Kon bo por haña PrEP?
Pa haña akseso na PrEP, papia ku bo dòkter di kas tokante un referensia na e spesialista na Curaçao Medical Center (CMC).
Kuantu PrEP ta kosta?
E preis di PrEP ta varia i ta karu. Tin biaha te ku 200 florin pa un luna. Aktualmente, Banko di Seguro Sosial (SVB) no ta kubrié.
Efektonan sekundario
PrEP ta seif pa uza. Pero meskos ku kualke otro remedi, e por tin efektonan sekundario. Spesialmente ora bo kuminsá uz’é. Bo por papia esaki ku bo dòkter.
Otro tópiko
Sigui eksplorá bo salú seksual.
Papia tokante uzo di kondon
Bo tabatin intenshon di uza un kondon, pero na momentu ku bo a kuminsá hasi sèks, esaki a parsebo algu asina laf pa diskutí… Awor...
Uza protekshon
Bo por redusí e chèns di haña un ITS dor di hasi uzo di un kondon semper ora bo tene relashon seksual. Papia ku bo...
Tipo di kondon
Si bo kondon ta pasbo korektamente, lo bo disfrutá mas tantu di sèks. Kondonnan regular ta pas mayoria hende hòmber i mucha hòmber, pero un...
