Kon pa tuma píldora

Strep di píldora di 21 dia

• Tuma un píldora pa dia na e mesun momentu durante 21 dia
• Despues ku bo kaba ku e strep, tuma un pousa di 4 pa 7 dia—lo bo haña un sangramentu di retiro, loke no ta un menstruashon di bèrdat
• Despues di e pousa, kuminsá ku un strep nobo (te asta si bo ta sangrando ainda)

Tep: Kuminsá despues di 4 dia na lugá di 7 ta hasi e píldora mas efektivo.

Strep di píldora di 28 dia

• Tuma un píldora pa dia na e mesun momentu durante 28 dia
• No tuma pousa—kuminsá ku un paki nobo mesora despues ku bo a kaba ku esun anterior

Tep pa uzo

Tuma esaki tur dia na e mesun momentu – Pone un rekordatorio den bo telefòn si ta nesesario! (ku eksepshon di e siman sin píldora si bo ta uzando píldora di 21 dia.)

Skohe e píldora korekto pa bo – Tin diferente tipo, manera píldora di kombinashon (estrógeno + progesterona) i e mini-píldora (progesterona so). Papia ku bo dòkter pa haña esun mihó.

Lesa e instrukshonnan – Kada marka di píldora por tin instrukshonnan un poko diferente, ke men chèk e foyeto ku ta bin kuné.

Malu despues di a beb’é? – Si bo ta saka òf haña diarea denter di 3 ora despues di tuma bo píldora, tuma un otro mas lihé posibel!

Unda bo por haña píldora?

Por haña píldora na botikanan i Fundashon Famia Planiá. Papia ku bo dòkter tokante píldora, promé ku bo kuminsá kuné. 

Kuantu e ta kosta?

Si bo ta bou di 18 aña, bo Banko di Seguro Sosial (SVB) por kubri bo gastunan di píldora. 

Den sierto sirkunstansia ta kubrié pa esnan di 18 aña p’ariba tambe. Normalmente esaki ta si tin un indikashon médiko pa tuma píldora i bo dòkter ta preskribié komo tal.  Sino, bo mes mester paga pa e píldora. Preisnan por varia di 6 pa 15 florin pa luna. E ta dependé di e tipo di píldora i lugá di kompra.  Píldora ta optenibel na Fundashon Famia Planiá i tur botika. 

Menstruashon

• Bo no ke sangra kada 4 siman? 
  E ora ei bo por salta e siman sin píldora. Esaki ta nifiká ku bo ta djis sigui tuma e píldoranan.
• Bo ke pa bo menstruashon ta mas kòrtiku?
  Djis hasi e siman sin píldora mas kòrtiku i kuminsá tuma píldora atrobe mas promé. Lo bo sangra ménos. Píldora ta ketu bai konfiabel i lo no afektá bo salú. 
• Bo no tin sigur kiko pa hasi? 
  Bishitá bo dòkter òf Fundashon Famia Planiá. 

No un menstruashon di bèrdat

Den e siman sin píldora lo bo sangra un tiki. E ta parse un menstruashon i e ta sinti asina tambe, pero bo no ta realmente menstruando. Kon esaki ta funshoná?

Tur luna tin un webu nobo den bo matris. Esaki ta sosodé durante ovulashon. Durante un menstruashon normal, ta deshasí di e webu ei. Si bo tuma píldora korektamente, bo no ta ovulá. Ke men, lo no tin webu pa deshasí di dje. Ta p’esei bo no ta hañando un menstruashon di bèrdè, djis un sangramentu chikitu.  

Bentaha i desbentaha

Bentaha

• Si bo uza píldora korektamente, e ta hopi konfiabel
• Lo bo sa ki ora lo tin sangramentu
• Bo por plania bo sangramentu ki ora ku bo ke
• Hopi biaha lo bo tin ménos doló durante un sangramentu
• Tin biaha bo ta haña ménos pèshi

Desbentaha 

• Lo bo por lubidá di tuma píldora
• Tin biaha lo bo por eksperensiá efektonan sekundario
• Píldora no ta protehá kontra ITS

Tin efektonan sekundario?

Ora bo kuminsá tuma píldora, lo bo por eksperensiá algun efekto sekundario. Esaki ta pasó bo kurpa tin ku kustumbrá ku e hormonanan ku tin den píldora. Posibel efektonan sekundario ta:

• doló di kabes
• pèrdida di sanger iregular 
• pechunan doloroso
• walmentu di stoma
• estado di ánimo abou
• subida di peso
• deseo seksual redusí

Normalmente, e efektonan sekundario ta disparsé despues di un par di luna. Tuma kontakto ku bo dòkter si bo tin problema ku efekto sekundario.

Ki ora bo ta kore rísiko di embaraso?

• B’a lubidá di tuma píldora
• B’a kuminsá muchu lat ku un strep nobo (pues bo siman sin píldora ta mas largu ku 7 dia)
• Bo tabatin diarea òf a saka