Prepará pa e promé biaha

1. Sera konosí ku bo propio kurpa

Komprondé kiko ta sinti bon pa bo, por yudabo sintibo mas kómodo ku un partner. Eksplorashon di bo mes kurpa dor di mishi ku bo mes (masturbashon) ta un manera saludabel pa siña tokante loke bo ta gusta i loke bo no ta gusta.

2. Ban poko poko

Sèks no mester nifiká penetrashon. E por enserá sunchi, mishi, sèks oral òf otro formanan di intimidat. Bo por tuma bo tempu i eksplorá stap pa stap, enfokando riba loke ta sinti bon.

3. Papia tokante dje

E por sinti straño, pero papia tokante sèks ku bo partner ta hasié mihó. Diskutí kiko bo ta sintibo kómodo kuné, kiko bo ta disfrutá di dje i kiko bo no ta kla p’e. Komunikashon ta yuda konstruí konfiansa.

4. Siña tokante embaraso i ITS

Hasi uzo di kondon i antikonseptivo ta protehá kontra embaraso i ITS. Papia ku un adulto di konfiansa, dòkter òf profeshonal di salú tokante bo opshonnan di antikonseptivo. Bo por bishitá Fundashon Famia Planiá tambe. Semper ta mihó pa bo ta prepará. Kòrda bon ku kondon ta e úniko método antikonseptivo ku ta protehá bo kontra ITS.

5. Skohe un partner ku bo ta konfia

Sèks ta un eksperensia íntimo i ora bo ta ku un hende ku bo ta konfia, esaki por hasié mas agradabel i ménos stresante. Si bo ta sintibo insigur, ku ta faltabo rèspèt òf inkómodo, talbes e no ta e momentu korekto òf e persona korekto.

6. E lo no ta perfekto i esaki ta oké

E promé biaha mashá poko biaha ta manera den pelíkula. E por sinti straño, chistoso òf no asina tremendo manera bo a ferwagt. Esaki ta kompletamente normal! Sèks ta bira mihó ku konfiansa, komunikashon i eksperensia.

7. Insertidumbre ta normal

Bo no mester tin tur kos resolvé. Ta oké pa tin pregunta, pa kambia di opinion òf pa warda te ora bo ta sintibo kompletamente kla.