Interakshon seksual

1. Masturbashon

Masturbashon ta e akto di mishi ku òf stimulá bo mes kurpa, spesialmente e genitalnan, pa plaser. E ta un manera natural i komun ku hende ta eksplorá loke ta sinti bon. Tin hende ta hasié hopi biaha, algun de bes en kuando i otronan no ta hasié mes, kada eksperensia ta diferente i esaki ta oké.

Masturbashon por ta un manera pa komprondé bo kurpa mihó. E ta kompletamente normal i un skohensia personal. Loke ta mas importante ta ku bo tin ku sintibo kómodo ku bo mes i bo desishonnan.

2. Sunchimentu

Sunchimentu ta nifiká mishi ku lepnan di un partner ku bo lepnan. Esaki por ta sea ku bo boka será òf ku bo boka habrí i uzando bo lenga.

3. Dalmentu di dede

Dalmentu di dede ta nifiká mishi ku e klitóris, vagina òf anus ku bo dedenan. Ora un hende ta hasié ku su mes, ta yama esaki masturbashon. 

4. Sèks oral

Sèks oral ta ora un hende ta uza su boka, lep òf lenga pa stimulá e genitalnan di un partner. Esaki por inkluí lembe, chupa òf sunchi e vulva, klitóris, pénis òf testíkulonan. Tin hende ta disfrutá di sèks oral komo un manera pa eksplorá intimidat i plaser. Uzando protekshon manera kondon por yuda  redusí e rísiko di ITS.

5. Sèks vaginal

Sèks vaginal ta sosodé ora algu drenta e vagina, manera un pénis, dede òf un ko’i hunga seksual. E por ta un eksperensia plasentero ora tur dos partner ta sinti nan mes kómodo i ta duna nan konsentimentu. Sèks vaginal ta tambe e manera ku embaraso por sosodé si un pénis ta enbolbí, pues uzando antikonseptivo manera kondon, e píldora òf un IUD por yuda prevení embaraso. Kondon por yuda redusí e rísiko di ITS tambe.

6. Sèks anal

Sèks anal ta enserá hinka un pénis, dede òf un ko’i hunga seksual den e anus. Komo ku e anus ta mas sensitivo i no ta produsí lubrikashon natural, hasi uzo di hopi lubrikashon i bai poko poko por hasié mas kómodo. Kondon ta yuda prevení ITS i komunikashon ku bo partner ta importante pa garantisá ku tur hende ta sinti nan mes sigur i respetá.

7. Mishimentu mutuo (Masturbashon huntu)

Esaki ta ora partnernan ta mishi ku nan mes òf ku otro pa eksplorá plaser huntu. E por inkluí uzo di man, ko’i hunga seksual, òf fregamentu kontra otro. E ta un manera ekselente pa konektá íntimamente sin penetrashon i no tin rísiko di embaraso.

8. Ko’i hunga seksual:

Ko’i hunga seksual ta ophetonan diseñá pa mehorá plaser, eksplorashon i intimidat, uzá nan so òf ku un partner. Nan ta bini den diferente forma, tamaño i material, manera vibrator i dildo, por ehèmpel. 

Semper limpia e ko’i hunganan promé i despues di uzo ku awa kayente i habon suave òf un limpiadó di ko’i hunga. Uza materialnan ku ta seif pa kurpa manera silikon di kalidat médiko i kondon si bo ta kompartí ko’i hunga ku otronan. 

9. Otro manera pa ta íntimo

Sèks no ta djis tokante relashon seksual – tin hopi manera pa sintibo serka di un hende. Sunchi, karisiá i eksplorá otro su kurpa segun bo mes ritmo por ta formanan di intimidat signifikante. Loke ta importante ta ku tur dos persona ta sinti nan mes kómodo i ta disfrutá di e eksperensia. 

Sèks Homoseksual

Sèks entre hende hòmber por enserá hopi forma di intimidat, inkluso sèks oral, masturbashon mutuo i sèks anal. Tur hende ta eksplorá plaser na diferente manera. Hasi uzo di kondon ku hopi lubrikante ta redusí e chèns di ITS i ta oumentá komodidat i plaser. Komunikashon i konsentimentu ta yuda krea un eksperensia positivo. Ta konsehá  hende hòmber ku tin sèks ku hende hòmber pa tèst regularmente, kada 6 luna, riba ITS. Bo por haña akseso na tèst grátis na Sentro pa Salubridat Seksual Kòrsou (CSGC). 

Sèks Lesbiana

Sèks entre hende muhé por enserá sèks oral, masturbashon mutuo, dalmentu di dede i uzo di ko’i hunga seksual. Tin hende ta disfrutá tambe di kontakto di kurpa-pa-kurpa pa stimulá otro. Pa protekshon kontra ITS durante sèks oral por uza bareranan, manera un kondon kòrtá habrí i komunikashon ta klave pa komprondé kiko ta sinti bon pa tur dos partner.

Orgasmo 

Un orgasmo ta un ola di plaser intenso ku ta tuma lugá ora eksitashon seksual alkansá su punto máksimo. E por sinti manera un koriente, un liberashon òf un seri di pulsonan kishi-kishi den bo kurpa. Tin orgasmo ta fuerte i di kurpa kompletu, miéntras ku otronan ta mas sutil – tur hende su eksperensia ta otro.

Hende por haña un orgasmo na diferente manera, manera dor di mishi ku nan mes, ta ku un partner, òf te asta djis fantasiá. Algun ta yega orgasmo fásilmente, miéntras ku pa otronan, e ta tuma tempu (òf kisas e no ta sosodé ètòl – i esaki ta oké!)

Un orgasmo por sinti tremendo, pero no ta meta di kada eksperensia seksual. Loke ta mas importante ta pa bo sintibo bon, eksplorá segun bo mes ritmo, i disfrutá di loke ta sinti bon pa bo.