Papia tokante sèks

Papia ku otro

Promé ku bo ta íntimo, ta hopi bon pa papia ku bo partner tokante kiko bo ta disfrutá di dje i kiko bo ta sintibo kómodo kuné. Esaki por enserá papia tokante kosnan manera kiko ta ponebo sinti bon i kiko lo bo tin gana di eksplorá. E por sinti difísil na promé instante, pero kuminsá e kòmbersashon por yuda boso tur dos sinti mas kómodo. Bo por bisa algu manera, “Esaki ta un tiki difísil pa mi bisa, pero mi ke papia tokante esaki ku bo,” i tin chèns ku bo partner por sinti meskos.

Kombertí esaki den un wega

Bo por hasi papiamentu tokante sèks mas dibertido i ménos straño dor di skirbi kosnan ku lo bo ke purba huntu òf papia tokante bo fantasianan. Skohe un nota bùrt pa bùrt i papia tokante di dje. Esaki por yuda boso siña mas tokante otro su deseonan i laga bosnan sinti mas serka di otro. 

Tep pa papia tokante sèks

1. Buska un espasio kómodo: Skohe un lugá trankil i relahante pa papia. Por ehèmpel, sinta riba un sofá òf un otro lugá kómodo por yuda bo sintibo mas trankil.
2. Konosé bo deseonan: Pensa riba kiko bo ke i kiko bo ta sintibo kómodo kuné. Sòru pa bo ta konsiente di bo mes límitenan i komuniká nan bon kla.
3. Sòru pa bo ta sigur: E por tuma un tiki kurashi pa kompartí bo sintimentunan, pero e ta yuda konstruí konfiansa. No tene miedu di bisa kiko bo ke òf no ke.
4. Skucha aktivamente: Sòru pa skucha bo partner kuidadosamente i mustra rèspèt pa su sintimentu- i límitenan. Relashonnan saludabel ta enserá siña for di otro.
5. Sòru pa bo ta kla i honesto: Si algu no ta sinti bon, sòru pa bo ta kla tokante bo intenshonnan. Por ehèmpel, si bo plan ta pa djis wak un pelíkula i bo no ta kla pa intimidat, bisa esaki bon kla.
6. Tuma nota di lenguahe di kurpa: Paga tinu riba bo partner su pista i señalnan. Lenguahe di kurpa positivo por mustra ku un hende ta interesá, pero semper sòru pa puntra i respetá otro su límitenan.
7. Kompartí bo sintimentunan: Laga bo partner sa ora algu ta sinti bon òf ora bo no ta sintibo kómodo. Semper ta oké pa bisa “nò” si bo ta sintibo insigur òf no gusta loke ta pasando.
8. Tene kuenta ku bo lenguahe di kurpa: Bo lenguahe di kurpa ta bisa hopi. Tene kuenta ku e mensahenan ku bo ta mandando i sòru pa nan ta kuadra ku loke bo ke.
9. “Kisas” por lo general ta nifiká “nò”: Si un hende no ta kla, ta importante pa respetá su espasio. “Kisas” hopi biaha ta un manera di ekspresá insertidumbre, pues ta un bon idea pa kontrolá i respetá un hende su sintimentunan.
10. Papia promé, no durante: Ta importante pa komuniká bo límite- i deseonan promé ku bo ta íntimo. Esaki ta yuda sigurá ku boso tur dos ta kómodo i prepará.

Nò ta keda nò te den port’i Shon Arei

Si algu no ta sinti korekto, kòrda bon semper: “Nò” ta keda nò te den port’i Shon Arei. No ta importá kiko bo tin bistí òf kon leu kosnan a yega, semper mester respetá bo límitenan. Si un hende ta  ignorá bo “nò,” nan no ta respetando bo i bo meresé mihó. Bo konfortabilidat i seguridat ta bin promé semper.