E promé biaha: Kiko pa ferwagt

No tin un manera so pa eksperensiá sèks pa promé biaha i no tin un lista di verifikashon ku bo mester sigui. Aki ta sigui algun kos pa tene kuenta kuné:

Tuma bo tempu: Kuminsá ku sunchi i mishi pa konstruí eksitashon. Si algu ta sinti bon, dal bai. Si no t’asina, stòp.
Chèk kon ta ku bo partner: Puntr’é si e ta sinti su mes kómodo i si e ta disfrutando di dje.
Uza protekshon: Semper uza un kondon, antikonseptivo, òf tur dos pa prevení ITS i embaraso.
No fingi nada: Bo no mester pretendé di disfrutá di algu òf haña un orgasmo si esaki no ta e kaso.
Ta oké pa hari! Sèks por ta desordená, inkómodo òf chistoso—no hinka bo mes den strès pa ta perfekto.

E promé biaha ta hasi doló?

Pa algun hende, nan promé biaha ta kómodo i agradabel. Pa otronan, e por ta un tiki inkómodo – spesialmente si nan ta tenshoná òf no ta kompletamente eksitá. Sèks nunka no mester ta doloroso. Si bo ta sinti doló, stòp i komuniká ku bo pareha. Eksitashon, lubrikashon i relahashon ta hasi tur e diferensia.

Despues di bo promé biaha

Sea ku e tabata algu inkreibel, straño òf desepshonante, e manera ku bo ta sinti despues ta importá.

Si bo a sinti ku e tabata bon: Esaki ta great! Komunikashon habrí i konfiansa a yuda hasi e eksperensia positivo.

Si bo a sinti ku e no tabata bon: Esaki tambe ta oké. E promé biaha no ta definí hinter bo eksperensia seksual. Si algu a sinti robes, pensa riba kiko bo ke kambia e siguiente biaha i no tene miedu di papia tokante dje.

Si bo ta lamentá e asuntu: No huzga bo mes. Hopi hende ta sinti asina, spesialmente si nan no tabata realmente kla òf a sinti preshon. Bo sintimentunan ta bálido i ta oké pa dal un paso atras i warda promé ku bo ta íntimo atrobe.

Bo tin nesesidat di papia? Si bo tin pregunta òf ta sinti inkómodo, papia ku un hende ku bo ta konfia – un amigu, ruman, konsehero òf dòkter. Bo por yama Ayudo pa Mucha i Hóben tambe anónimamente i grátis òf tuma kontakto ku Biba Amor. Bo no ta bo so.

Bo kurpa, bo skohensia

No ta eksistí un momentu korekto òf robes pa tin sèks—solamente loke ta sinti bon pa bo. Semper bo por bisa si, nò, òf kambia di idea na kualke momentu. E kos di mas importante ta ku bo ta sintibo sigur, respetá i den kòntròl di bo desishonnan. Sèks ta tokante konekshon, komunikashon i skohensia. Tuma bo tempu, konfia bo mes, i no laga niun hende preshoná bo pa hasi algu ku bo no ta kla p’e.