Ken ta atraé bo?

Haña sa ken ta atraé bo

Bo ta haña sa ken ta atraé bo ora bo namorá. Esaki ta konta pa hóbennan transgénero di e mesun manera ku e ta konta pa otro hóbennan. I asina bo ta deskubrí si bo ta atraé na un hende di e mesun sekso, e sekso opuesto, òf tur dos.

Deskubrimentu

Kisas bo sa perfektamente bon si bo ta atraé na un hende di e mesun sekso, e sekso opuesto, òf tur dos. Pero kisas bo no sa. Ora bo ta transgénero, e por ta difísil pa haña sa:

• Kisas bo ta muchu okupá pa haña sa ken bo ta.
• Kisas bo no ta sintibo kómodo den bo kurpa, pues bo no ta interesá den namorá òf sèks.
• Bo no sa dikon bo ta gusta hende hòmber òf ta preferá hende muhé. Pasobra bo ta namorá di un hende? Of ta pasobra bo mes ke ta un hòmber òf un muhé?
• E hendenan rondó di bo por pensa ku bo ta homoseksual òf lesbiana, enbes di transgénero. Kisas abo tambe a pensa asina.
• Si bo no sa na ken bo ta sintibo atraé, no preokupá ku esaki! Bo no mester disidí ainda.

Kambia bo label

Ora bo ta den transishon, bo preferensia seksual no ta kambia normalmente. Esaki ta nifiká ku si bo tabata gusta hende muhé promé ku bo transishon, probablemente lo bo sigui hasié despues di bo transishon.  Hopi biaha e ‘label’ ku bo ta haña ta kambia. Por ehèmpel, tempu bo tabata hòmber ainda, hende tabata yama bo heteroseksual. Awor ku bo ta femenino, nan ta yamabo lesbiana.

Mas i mas bo mes

Bo no tabatin sigur tokante ken bo tabata atraé na dje promé ku bo transishon? Ora bo transishoná, bo ta bira mas i mas bo mes i bo ta mas den kontakto ku bo sintimentunan. E ora ei lo ta mas fásil pa deskubrí ken bo ta atraé na dje. Ta p’esei tin hende ta kambia nan orientashon seksual durante transishon.