Klamidia

Síntomanan di klamidia

Si bo tin klamidia, e ora ei bo por haña síntoma. Bo tin mas chèns di nota algu 1-3 siman despues di tene relashon seksual.

Serka hende hòmber, esaki generalmente ta líkido – tambe yamá deskarga – ku ta sali for di bo pénis. Hopi biaha e ta awa i ta sosodé despues ku bo lanta mainta. Urinamentu tambe por ta doloroso òf e por duna un sensashon di kimamentu.

Serka hende muhé, líkido por sali for di nan vagina. Friu (òf deskarga) vaginal ta normal, pero si bo tin klamidia, e lo ta mas ku normalmente i lo mustra diferente tambe. Urinamentu tambe por ta doloroso òf e por duna un sensashon di kimamentu.

Tin biaha klamidia por afektá bo anus i kousa sierto molèster. Esaki por ta grawatashi òf doló ora bo bai af.

Síntomanan serka hende muhé

• Mas líkido (deskarga) ku normal ku por mustra diferente
• Doló òf sensashon di kimamentu ora di uriná
• Doló òf sangramentu vaginal durante òf despues di sèks
• Doló di barika
• Grawatashi òf iritashon den e área anal
• Sanger den bo shushi (pupu) òf diarea

Síntomanan serka hende hòmber

• Líkido ta sali for di bo pénis, generalmente mainta
• Doló òf sensashon di kimamentu ora di uriná
• Doló den bo skrotem
• Grawatashi òf iritashon den e área anal
• Sanger den bo shushi (pupu) òf diarea

Klamidia sin síntoma

Normalmente, hende muhé i mucha muhé no ta ripará mes ku nan tin klamidia. Meskos ta konta pa algun mucha hòmber i hende hòmber. Ke men, bo por asta tin klamidia sin ningun síntoma i bo por pega un otro hende durante sèks.

Fásil pa trata!

Klamidia ta un ITS ku ta fásil pa trata ku remedi. Bo ta kere ku bo por tin e?

Kisas pasobra:

• Bo a hasi sèks sin un kondon
• Bo tin síntoma
• Bo tabatin sèks ku un hende ku tin klamidia

Si esaki ta e kaso, bishitá bo dòkter òf CSGC pa un tèst di ITS. Si bo ta bira un tiki nèrvioso relashoná k’e echo ku bo tin ku hasi esaki, bo no ta e úniko, hopi biaha otronan tambe ta sinti asina. Pero ta proaktivo pa bo salú seksual ta algu ku bo mester ta orguyoso p’e. Si bo a test na CSGC i bo tin klamidia, na CSGC mes lo bo risibí bo tratamentu.

Kiko ta sosodé si bo keda sin buska tratamentu pa klamidia?

Si no buska tratamentu pa e infekshon di klamidia, mayoria mucha muhé i hende muhé nunka lo no tin ningun síntoma. Pero pa algun hende muhé, e infekshon lo plama pa e tubunan di Falopio. Esaki por kousa doló severo na parti abou di barika, tin biaha ku keintura. Of doló di barika króniko mas lat den bida. Bo tin algun di e síntomanan akí? Traha un sita pa bishitá bo dòkter òf bai CSGC. 

E por hasibo infértil?

Si e por, pero tin solamente un chèns hopi chikí ku esaki por sosodé. Tin un chèns mas grandi ku lo bo tin difikultat pa sali na estado si bo a keda infektá ku klamidia mas ku un biaha. I si bo tin síntoma.

Bisa bo partnernan seksual

Si bo tin klamidia, bisa e hendenan ku bo a tene relashon seksual kuné resientemente. E ora ei nan por laga hasi tèst i risibí tratamentu tambe. Papia ku bo dòkter òf enfermero tokante ken bo mester bisa.