Kon pa superá un situashon difísil

Señalnan ku e ta afektando bo

Un eksperensia difísil por impaktá tantu bo mente komo bo kurpa. Bo por nota:

• Rekuerdo- òf temornan ku ta bin bèk: Bo ta keda pensa riba loke a pasa, tin pesadia, òf ta sinti ansha pa mira e persona enbolbí
• Strès i kansansio: Bo ta sinti bo tenso, turdí òf inkapas pa enfoká. Kisas bo ta haña doló di kabes òf stoma frekuentemente
• Sinti deskonektá for di bo kurpa: Bo ta sinti bèrgwensa, inkómodo den bo mes kueru, òf asta bo ta kuminsá repugná bo kurpa
• Kambio den ki bo ta pensa di sèks: Bo por pèrdè interes den sèks, sinti miedu di dje, òf te asta hañ’é angustiante
• Kulpa òf rabia: Bo por kulpa bo mes, sinti bèrgwensa, pèrdè konfiansa den otronan, òf sinti rabia riba mundu

Si sèks a tuma lugá sin kondon, bo por kore rísiko riba un ITS òf embaraso. Ta importante pa laga hasi un tèst. Bishitá bo dòkter òf Sentro pa Salubridat Seksual Kòrsou (CSGC)  pa sosten.

NO ta bo falta

Hopi hende ta kulpa nan mes despues di un eksperensia seksual indeseá – pero nunka no ta bo falta. Niun hende no tin derechi di preshoná, fòrsa òf probechá di bo. Ni si bo tabata konketiá, ni pa motibu di loke bo tabatin bistí, i ni si bosnan tabata den un relashon.  

Kiko bo por hasi?

Papia ku un hende ku bo ta konfia: Un amigu, miembro di famia, maestro, organisashonnan di sosten manera Bos di Hubentut.  Bo por yama Ayudo pa Mucha i Hóben, na 918, grátis i di forma anónimo. Papia por ta un alivio grandi.

Buska yudansa profeshonal: Un terapista òf sikólogo por yudabo prosesá bo sintimentunan i lagabo sinti mihó. Bo dòkter por referí bo na e sosten korekto.

Kuidou ku alkohòl i droga: Nan por parse un manera pa dil ku kosnan, pero hopi biaha nan ta hasi nan mas difísil riba plaso largu.

Konsiderá akshon legal: Si bo ke, bo por eksplorá entregá un rapòrt polisial òf buska hustisia. Ta bo skohensia.

Tuma kontakto ku Polis

• 911: Emergensia
• 917: No Emergensia
• 108: Raportá anónimamente

Kuida bo salú – Si sèks a tuma lugá sin protekshon, laga nan tèstbo riba ITS i embaraso mas lihé posibel.

Bo no ta bo so

Kiko ku bo por ta sinti, sa ku tin sosten disponibel. Bo meresé pa sana, sintibo seif i pa ta den kòntròl di bo propio kurpa i skohensianan.