Gonorea

Señal- i síntomanan di gonorea

No ta tur ora bo ta ripará ku bo tin gonorea. Hende muhé i mucha muhé hopi biaha no tin síntoma mes. Mucha hòmber i hende hòmber normalmente si. Bo por nota algu mesora despues di a tene relashon seksual ku un hende ku tin gonorea. Pero e por dura un tiki mas largu ku esei. Síntomanan serka hende hòmber te ku 6 siman, síntomanan serka hende muhé te ku 3 luna. I asta sin síntoma ètòl, bo por infektá otro.

Síntomanan serka hende hòmber

• Líkido ta sali for di bo pénis, mayoria biaha den oranan di mainta. E ta blanku-hel òf bèrdè. Ta yama esaki ‘drip’ òf ‘gota’
• Doló ora bo ta uriná
• Un sensashon di kimamentu ora bo ta uriná
• Iritashon rondó di bo anus si bo a hasi sèks anal
• Sanger òf líkido den bo shushi òf diarea si bo a hasi sèks anal
• Doló den bo testíkulonan
• Doló di garganta, si bo a hasi sèks oral

Síntomanan serka hende muhé

Hopi biaha hende muhé i mucha muhé no tin síntoma mes. Síntomanan ku bo por tin ta:

• Doló ora bo ta uriná
• Un sensashon di kimamentu ora bo ta uriná
• Doló òf sangramentu vaginal durante òf despues di sèks
• Sangramentu vaginal ora bo no a haña bo regla
• Mas líkido (deskarga) ku normal ku lo por mustra diferente. Talbes e no ta hole dushi i por ta hel òf bèrdè
• Iritashon rondó di bo anus si bo a hasi sèks anal

• Sanger òf líkido den bo shushi òf diarea si bo a hasi sèks anal
• Doló apdominal fuerte 
• Doló di garganta, si bo a hasi sèks oral

Medikamentu pa trata gonorea

Bo por risibí tratamentu pa gonorea ku ta eliminá e infekshon. E tratamentu ta un angua. Si bo a test na CSGC i bo tin gonorea, na CSGC mes lo bo risibí bo tratamentu.

Bo ta kere bo tin e ITS akí? Talbes pasó:

• Bo a hasi sèks sin un kondon
• Bo tin síntoma
• Bo tabatin sèks ku un hende ku tin gonorea

Bishitá bo dòkter òf CSGC e ora ei pa un tèst di ITS.

Dikon mi mester risibí tratamentu?

Si bo no risibí tratamentu, bo síntomanan por bira mas pió e ora ei. Esaki no sa sosodé hopi biaha, pero tòg e ta un posibilidat si bo no risibí tratamentu. E lo afektá hende hòmber i hende muhé na un otro manera.

Hende muhé por haña infekshon di e tubunan di Falopio. Esaki ta nifiká:

• Bo por bira infértil. Lo ta difísil pa haña yu e ora ei
• Bo tin un chèns mas haltu di embaraso ektópiko. Esaki ta nifiká ku bo yu ta kuminsá krese pafó di e matris i no por sobrebibí

Hende hòmberpor tin e síntomanan akí:

• Un inflamashon di bo epidídimo: bo testikulonan ta hasi doló i ta hinchá
• Un infekshon di prostat: bo por tin keintura i doló i tambe doló ora di uriná

Bisa bo partnernan seksua

Si bo tin gonorea, bisa e hendenan ku bo a tene relashon seksual kuné resientemente. E ora ei nan por laga hasi tèst i risibí tratamentu tambe. Papia ku bo dòkter òf enfermero tokante ken bo mester bisa.