Sèks kontra bo boluntat

Kiko esaki ta eksaktamente?

Sèks kontra bo boluntat ta tuma lugá ora un hende fòrsa òf preshoná bo den aktividatnan seksual ku bo no ke i ku bo no a bai di akuerdo kuné. E ta un violashon serio di bo límitenan i por sosodé na diferente manera.

Aki ta sigui algun ehèmpel:

• Bo ta bailando i un hende ta bin frega kontra bo na un manera ku ta hasi bo inkómodo
• Un miembro di famia, manera un tanta òf un tio, ta mishi ku bo na un manera inapropiá
• Bo pareha ta preshoná bo pa hasi sierto kos den kama
• Bo èks ta kompartí un potrèt privá di bo sin bo pèrmit

Esakinan tur ta situashonnan kaminda un hende no ta respetando bo límitenan òf bo konsentimentu.

Opvio òf sutil?

Sèks kontra bo boluntat tin biaha por ta hopi kla i otro biaha e ta mas sutil:

• Opvio: Un hende ta ignorá bo “nò” òf ta uza violensia pa fòrsabo
• Sutil: Un hende ta preshoná bo pa tene relashon seksual, ta surpasá bo límitenan ora bo ta burachi òf drumí òf ta ponebo sinti ku bo no tin otro opshon   

Hopi biaha ta un hende ku bo konosé

E persona ku ta surpasá bo límitenan hopi biaha ta un hende ku bo konosé, loke por ta konfuso òf te asta ponebo kuestioná bo mes. Pero no ta importá ken nan ta, bo límitenan ta importante i mester respetá nan semper. Si un hende ta hasi bo inkómodo òf no tin kunes ku bo límitenan, ta bon pa papia, fiha límitenan firme i akudí serka un hende ku bo ta konfia pa sosten.

Bo ta sinti bo kulpabel? No ta bo falta.

Hopi hende ku ta eksperensiá komportashon seksual indeseá ta sinti nan mes kulpabel despues. Nan por puntra nan mes si nan:

• A bisa òf hasi algu pa provoká esaki
• No tabata sufisientemente kla tokante nan límitenan

Pero ta importante pa kòrda:

• No ta importá kiko bo tabatin bistí òf kuantu bo a bebe
• No ta importá si tabata bo partner òf un hende ku bo konosé

Bo kurpa ta bo kurpa i niun hende no tin derechi di surpasá bo límitenan.