Salta bo siman sin píldora òf hasié mas kòrtiku

Bo ke salta e siman sin píldora?

Bo por salta bo siman sin píldora. Sigui tuma píldora despues di 21 dia no ta un problema ètòl. 

Strep ku 21 píldora

Kòrda bon: bo por salta bo siman sin píldora òf hasié mas kòrtiku si bo strep di píldora ta kontené  21 píldora ku ta eksaktamente meskos. Bo ta bai tuma un otro tipo di píldora? Lesa e foyeto di instrukshon òf papia ku bo dòkter e ora ei.

Pousa sin píldora mas kòrtiku

Bo por stòp di tuma píldora tambe pa ménos ku 7 dia. Pues bo por, por ehèmpel, stòp 4 dia i despues kuminsá tuma píldora atrobe. Algun mucha muhé ta hasi esaki pa nan tin ménos problema ku sangramentu.  

Nunka no stòp pa mas ku 7 dia!

Sòru pa nunka bo no hasi e pousa sin píldora pa mas largu ku 7 dia. Si bo stòp di tuma píldora pa mas ku un siman, bo no ta protehá mas kontra embaraso.

No un menstruashon di bèrdat

Den e siman sin píldora lo bo sangra un tiki. E ta parse un menstruashon i e ta sinti asina tambe, pero bo no ta menstruando realmente. Kon esaki ta funshoná?

Tur luna tin un webu nobo den bo matris. Esaki ta sosodé durante ovulashon. Durante un menstruashon normal, ta deshasí di e webu ei. Si bo tuma píldora korektamente, bo no ta ovulá. Pues lo no tin webu pa deshasí di dje tampoko. Ta p’esei bo no ta hañando un menstruashon realmente, djis un tiki sangramentu.