Kiko ta ITS?

ITS Bakterial

E siguiente ITSnan ta keda kousá pa bakteria:

• klamidia
• gonorea    
• sífilis

ITS Viral

E siguiente ITSnan ta keda kousá pa un vírùs:

• frèt genital
• herpes genital
• hepatitis B
• HIV 

Parasit

E siguiente ITSnan ta keda kousá pa un parasit:

• trikomoniasis
• plateis
• sarna 

Kon bo ta haña un ITS?

Bo ta pega ku ITS durante sèks, spesialmente si bo no ta uza kondon. Por ehèmpel:

• Ora un pénis drenta un vagina òf anus
• Durante sèks oral

Generalmente ta haña ITS den vagina, pénis òf anus. Nan por ta den bo boka òf garganta tambe.

Señal- i síntomanan di ITS

Si bo tin un ITS, bo por eksperensiá síntomanan manera esakinan:

• Friu (deskarga) òf pus for di vagina, pénis of anus (mas ku normal). E friu por ta awa, lechi, hel of bèrdè. E por hole diferente
• Un sensashon di kimamentu, iritashon òf doló promé òf despues di uriná. Of hopi biaha ku nesesidat pa saka tiki kantidat di urina
• Herida, frèt òf blar riba pénis, vagina, anus òf boka
• Grawatashi den kabei púbiko, òf riba e labianan, anus òf kabes di e pénis
• Glándulanan hinchá den bo las
• Doló den bo testíkulonan
• Doló parti abou di barika
• Doló durante sèks
• Sangramentu vaginal despues di sèks. Asta si no ta bo regla

Bo tin 1 òf mas di e síntomanan aki? Por ta ku no ta un ITS. Por ta algu otro. Pa bo sa sigur, traha un sita ku bo dòkter òf na CSGC. 

Por ta un ITS, sin síntoma?
Bo por tin un ITS sin tin ningun síntoma. Bo no ta ripará nada. I tòg bo por pega un otro hende durante sèks. Pa haña sa si bo tin un ITS òf nò, laga nan tèstbo.