Bo a hasi sèks sin kondon? Tuma akshon!

Ki ora tin un chèns di embaraso?

• Si bo tene relashon seksual kaminda pénis a penetrá den vagina sin hasi uzo di un antikonseptivo òf kondon konfiabel
• Si simia òf pre-eyakulashon drenta den e vagina
• Si bo ta tuma e píldora, pero bo a salta 1 òf mas píldora
• Si bo ta tuma e píldora i bo ta eksperensiá sakamentu òf diarea denter di 3 ora ku bo a tum’é
• Si e kondon kibra i bo no ta uzando niun otro antikonseptivo
• Si algu bai robes ku bo renchi, pleister, inyekshon antikonseptivo, implante hormonal òf IUD

Bo no ke sali na estado?

Bo tin opshonnan antikonseptivo di emergensia.

1. Píldora di e mainta despues: 

Buska e píldora di e mainta despues, hopi biaha ta referí na dje komo antikonseptivo di emergensia, na un botika òf Fundashon Famia Planiá mas pronto posibel. Bo por hasi esaki sin un reseta. Si bo hasi esaki denter di 5 dia despues di sèks, e chèns pa bo sali na estado ta mas chikí. Mas lihé bo hasi esaki, mas efektivo lo e ta.

2. IUD di Koper (Aparato Intrauterino):

Bo por laga hinka un IUD di koper den bo matris. Por hasi esaki te ku 5 dia despues di sèks sin protekshon. Bishitá bo dòkter òf Fundashon Famia Planiá pa esaki. Despues di esei, un spiral di koper ta protehá bo kontra embaraso pa 5 te 10 aña.

Bo ke sali na estado?

Warda ku pasenshi, kaba hasi un tèst di embaraso . Bo por hasi esaki for di e promé dia ku bo menstruashon lo mester a kuminsá. Bo por kumpra un tèst di embaraso na botika. Bo por hasi un tèst di embaraso na Fundashon Famia Plania tambe. 

Partnernan, bosnan tambe por hasi algu!

Komo mucha hòmber, bo tabatin sèks no-protehá ku un mucha muhé? I niun di boso dos no ta deseá un embaraso? Esaki ta loke boso dos lo por hasi huntu:

• Buska e píldora di e mainta despues na un botika òf na Fundashon Famia Plania
• Si bo partner ta preferá e IUD di emergensia, bishitá bo dòkter òf Fundashon Famia Plania huntu. E IUD di emergensia ta un spiral di koper
• Parti e gastunan di e píldora di e mainta despues òf e IUD di emergensia. Na Fundashon Famia Plania, e IUD di koper ta kosta mas o ménos 85 florin i e píldora di e mainta despues ta kosta mas o ménos 12.50 florin

Sèks no-protehá ku regularidat?

Buska antikonseptivo ku ta pas ku bo. Eksplorá bo opshonnan di antikonseptivo akinan.

Tèst di ITS

Si bo a tene relashon seksual sin un kondon, tin un chèns ku bo a pega ku un ITS. Bo por laga hasi un tèst di ITS na  Sentro pa Salubridat Seksual Kòrsou (CSGC), òf serka bo mes dòkter.